Albert the Great, Summa Theologiae

1. Peccatum originale non est nisi nuditas et carentia debitae justitiae per inobedientiam primorum parentum contracta, ut dicit Anselmus. Haec omnia fuerunt in primis parentibus. Ergo originale fuit in eis.

2. Adhuc, Sicut dicit Augustinus, paena non est sine culpa, quia aliter injusta esset: sed Adam et Heva puniti erant paena originalis peccati, scilicet carentia visionis Dei: descenderunt enim ad limbum: ergo videtur, quod habuerant originale peccatum.

3. Adhuc, Omne peccatum ortum est a peccato eorum, ut dicit Apostolus , et in hoc oportet ut posteri portent imaginem terreni parentis. Imago autem illa primo fuit in parentibus terrenis. Ergo videtur, quod originale fuit in eis. Contra:

1. Augustinus contra Pelagianos et Caelestianos tractans illud verbum Apostoli, I ad Corinth. xv, 48: Qualis terrenus, tales ei terreni, sic dicit: " Et hoc quomodo ? nisi per seminis sparsionem. Si dicis mihi, e diverso veniens: ergo semen peccatum est. Jam superius dixi, quia quando peccavit homo, natura peccavit cujus sunt semina. Semen ergo vitiatum est, sicut scriptum est, Sapient. xii, 10 et 11: Quoniam non poterat mutari cogitatio illorum in perpetuum. Semen enim erat maledictum ab mitto. Haec enim maledictio fuit post peccatum: sed, sicut dicitur, Genes, iii, 17: Maledicta terra in opere tuo. " Ex hoc accipitur, quod originale non transfunditur nisi in eum qui nascitur per seminis sparsionem: Adam et Heva non sunt sic nati: ergo non habuerunt originale.

2. Adhuc, Augustinus contra Pelagianos, libro de Nuptiis et concupiscentia: " Non propagatio, sed libido transmittit originale in posteros. " Sed. primorum parentum corpora non fuerunt seminata in libidine. Ergo videtur, quod non habuerunt originale peccatum.

3. Adhuc, Constat, quod ex Deo formante non poterant habere originale. Iterum ex conjunctione animae ad corpus quod Deus formavit, non poterat infici anima infectione originalis: quia corpus non erat corruptum vitiosa corruptione. Ergo videtur, quod in primis parentibus nullum fuit originale.

4. Adhuc, Augustinus in libro de Nuptiis et concupiscentia ad comitem quemdam: " Ex concupiscentia libidinosa tamquam filia peccati nascitur peccatum in parvulis, cujus impudicus praedicator est Pelagius. " Talis concupiscentia non fuit in primis parentibus. Ergo nec originale.

Solutio. Dicendum, quod originale dicitur duobus modis: originale originans, et originale originatum. In originali primo modo dicto, hoc est, originante, persona corrumpit naturam. Dicit enim Apostolus: In quo omnes peccaverunt . Et dicit Augustinus, quod " non omnes in ipso peccassent, si non omnes in ipso fuissent per corpulentam substantiam, et nisi omnes ipse peccans fuisset tunc quando peccavit. " In originali autem originato natura corrumpit personam: ex hoc enim quod in libidine seminatur, statim accipit concupiscentiam noxiorum, et ignorantiam agendorum, quae proprie poenae sunt originalis peccati. Et, sicut dicit Augustinus, justitiae Dei non congrueret, quod aliquem teneret paena quem non tenet culpa. Et sic relinquitur, quod in animabus parvulorum est culpa originalis contracta ex vitiosa corruptione carnis: et sic quidem corruptio originalis fuit in primis parentibus ex vitio personae, quae infecit naturam per peccatum quod commiserunt.

Ad primum ergo dicendum, quod peccatum originale fuit in Adam et Heva, non per eumdem modum quo est in parvulis, sicut dictum est.

Ad aliud dicendum, quod in primis parentibus fuit nuditas justitiae ex personali peccato causata.

Ad ultimum: dicendum, quod imago prima omnis corruptionis fuit in primis parentibus sicut in exemplo et similitudine: quia aliter non diceret Apostolus, I ad Corinth. xv, 48: Qualis terrenus, etc. Et ibidem, v. 49: Igitur, sicut portavimus imaginem terreni, portemus et imaginem caelestis. Sed totum hoc ex peccato personae causatum, fuit, non ex vitio naturae sicut in parvulis: et propter hoc improprie dicitur originale.

Ad id quod objicitur ab Augustino contra Pelagianos et Caelestianos, dicendum, quod ibidem loquitur Augustinus de originali proprie dicto sicut est in parvulis, quod ex vitio naturae contrahitur: quia de hoc solum fuit quaestio inter eum et Pelagium.

Ad aliud dicendum eodem modo, quod ibi non loquitur nisi de originali originato in parvulis, quod causatur ex vitiosa libidine corruptae naturae.

Ad aliud dicendum, quod hoc modo non fuit originale in primis parentibus, sed modo quo dictum est.

Ad ultimum dicendum, quod ibi non loquitur Augustinus nisi de originali proprie dicto secundum quod est in parvulis: quia de hoc solum fuit quaestio inter eum et Pelagium, ut dictum est.

ARTICULI TERTII