Albert the Great, Commentarii In Psalmos

Christi Ecclesia petivit a Deo festinum adjutorium, convertit se ad filios suos, ostendens a Deo esse omne bonum, et totum Dei gratiae esse. Et loquitur secundum unam expositionem omnibus filiis tam bonis quam malis : bonis qui signantur per filios Jonadab : malis qui per primos captivatos de Judaeis signantur. Nota enim primo quod habetur Jerem. XXXV, 6 et seq., de filiis Jonadab, qui ad praeceptum patris sui Rechab vinum non bibebant, in domibus non habitabant, in quibus signantur haerentes

Patri caelesti, de quo Deuteron, XXXII 6 : Numquid non ipse est pater tuus, qui, etc. Et illud Isa. lxiv, 8 : Et nunc Domine pater noster es tu, nos vero lutum : et fictor noster tu, et opera manuum tuarum omnes nos. Et etiam parentibus propter ipsum, et in his quae non sunt contra Deum, secundum illud Exod. xx, 12 : Honora patrem tuum, et matrem tuam, honore reverentiae. Notandum et illud IV Reg. xxv, 1 et seq., de captivitate Judaeorum a Babyloniis prima, in qua monstrantur captivati Judaei propter inobedientiam, et signant inobedientes, et captivatos sub carnali concupiscentia propter primi hominis inobedientiam primo et principaliter, quam gemebat Paulus,ad Rom. vii, 24 : Infelix ego homo, quis me liberabit de corpore mortis hujus, etc. Et rursus, v. 23 : Video aliam legem in membris meis, repugnantem legi mentis meae, et captivantem me in lege peccati.

Sensus ergo tituli propositi hic est : " Psalmus David, " id est, a David propheta editus, " Filiorum Jonadab, et priorum captivorum " excitativus. " Filiorum Jonadab, " id est obedientium, et bonorum, ut bonum quod habent, gratiae Dei attribuant, scientes illud I ad Corinth.IV, 7 : Quid habes quod non accepisti ? Et rursus, Jacob.I, 17 : Omne datum optimum, et omne donum perfectum desursum est. " Et priorum captivorum, " id est, sub servitute concupiscentiae detentorum, et in peccati servi- tute, ut sciant se per Dei gratiam, non aliter liberandos. I ad Cor. xv, 10 : Gratia Dei sum id quod sum.

Vel potest accipi pro eisdem, cum dicitur, " filiorum Jonadab, et priorum captivorum. " Est autem duplex captivitas. Una qua captivi sumus in hoc mundo, et haec prima : et alia qua in inferno, et haec secunda. Est ergo sensus : " Psalmus David " excitativus " filiorum Jonadab, " Dei scilicet : Jonadab enim interpretatur voluntarius , interpretatur et Deus, de quo Jacob.I, 18 : Voluntarie enim genuit nos Deus, verbo veritatis. Vel, " Jonadab " Jesus Christus, de quo Isa. liii, 7 : Oblatus est quia ipse voluit. " Et priorum captivorum, " hoc est, ipsorum, qui tenentur adhuc in captivitate prima. Vel, " priorum captivorum) " id est, prius captivatorum, quam essent ad Deum conversi : talibus enim Psalmus hic est cantandus.

Dividitur autem Psalmus in duas partes. Primo quidem orat Ecclesia, ostendens quod omne bonum a Deo habeat. Secundo, intendit et vacat laudibus ejus quem orat, ibi, " Deus, quis similis. "

In prima duo. Primo, orat petendo adjuvari simpliciter. Secundo, in quodam statu specialiter, scilicet in statu senectutis, ibi, " Ne proijcias me. "

In prima duo. Primo, orat ut impetret liberationem. Secundo, ut ipsa impetrata gratias referre valeat, monstrans in hoc quod cujus est bona dare, ejusdem est conferre, quod gratiae referantur, etc. ibi, " Repleatur os meum laude. "

In prima duo. Primo, orat pro sua liberatione. Secundo, magis specificat a quibus velit liberari, addita persuasione, ibi, " Deus, eripe me. "

In prima tria. Primo, tangit impetrandi fiduciam. Secundo, subjungit petitionem, ibi, " In justitia tua. " Tertio, primi probationem, quod scilicet ipse debet confidere, ibi, " Quoniam firmamentum. "

In prima duo. Primo tangit causam fiduciae. Secundo, fiduciam, ibi, " Non confundar, "