Albert the Great, Summa Theologiae

1. I Joan. i, 8: Si dixerimus quoniam peccatum non habemus, ipsi nos seducimus, et veritas in nobis non est. Peccatum non est nisi ex concupiscentia et fomite: quia dicit. Augustinus in libro de Nuptiis et concupiscentia, quod ex concupiscentia et fomite tamquam filia peccati innascitur peccatum: ergo videtur, quod in nullo exstinguitur.

2. Adhuc, Job, xv, 14: Quid est homo ut immaculatus sit, et ut justus appareat natus de muliere ? Cum ergo peccatum non insit sine concupiscentia et fomite, videtur quod nullus sit sine fomite: ergo in nullo exstinguitur,

5. Adhuc, Augustinus in libro Retractationum: " In hac vita nemo ita servat mandata justitiae, ut non sit ei necessarium orare pro peccatis suis, et dicere: Dimitte nobis debita nostra . " Ergo videtur, quod nullus in hac vita absolvitur a fomite concupiscentiae: quia debita non sunt nisi propter peccata contracta.

4. Adhuc, Augustinus in libro de Natura et gratia: a Etiamsi non hic vivatur sine peccato, licet tamen mori sine peccato, dum peccatum venia deletur, quod peccatum ignorantia vel infirmitate committitur. " Sine infirmitate non vivit homo quae proprius effectus est fomitis. Ergo videtur, quod in toto fomes non exstinguitur in aliquo.

5. Adhuc, Ad Roman, vii, 16 et 17: Si quod nolo, illud facio, consentio legi, quoniam bona est. Nunc autem jam non ego operor illud, sed quod habitat in me peccatum. Dicit Glossa ibi, quod loquitur in persona hominis damnati. Omnes damnati sunt qui contrahunt originale. Ergo videtur, quod omnes qui contrahunt originale, fomitem habent non exstinctum.

6. Adhuc, Bernardus super Cantica: " Quantumlibet in hoc corpore manens profeceris, erras si vitia putes emortua, et non magis suppressa. Velis nolis in- tra fines tuos habitat Jebusaeus: subjugari potest, sed non exterminari . " Sed habitare Jebusaeum, est fomitem et concupiscentiam habitare. Ergo videtur, quod in nullo exstinguitur concupiscentia et fomes.

Contra:

1. Augustinus in libro de Baptismo parvulorum: " Non praestatur in baptismo ut lex peccati quae est in membris nostris, exstinguatur prorsus, ita ut non sit, nisi forte vinculo creatoris ineffabili. " Ergo ad minus potest exstingui vinculo creatoris miraculose.

2. Adhuc, Constat, quod in Christo nullus fuit fomes: propinquissimo autem vinculo naturae et gratiae alligata fuit Virgo mater Filio: ergo et in matre fomes in toto fuit exstinctus: ergo in aliquo potest in toto exstingui.

3. Adhuc, Anselmus in libro de Conceptu virginali : " Decebat ut Virgo illa ea puritate niteret, qua major sub Deo nequit intelligi, quam Deus Pater umbra suae virtutis et imagine, Filio suo quem de corde suo genitum tamquam seipsum diligebat, et de qua Filius pellem nostrae mortalitatis accepit: et, sicut dicit Gregorius, flamma divinitatis suae implevit, qua mulier evangelica, sapientia scilicet divina, composuit lucernam, totam domum Ecclesiae illustravit, et invenit drachmam decimam per peccatum primi parentis perditam, summi Regis imagine insignitam, et in thesaurum summi Regis reponendam et non amplius perdendam, et quam Spiritus omni perfectione sanctitatis sanctificavit ei matrem, de quo ipse secundum divinitatem procedit: ut sic triplici illustratione, Patris scilicet, Filii, et Spiritus sancti, eluxerit in eam claritatem, qua major sub Deo nequit intelligi. " Sed talis sanctitas non potest esse in eo in quo est aliqua umbra peccati: umbra peccati est fomes: ergo in beata Virgine fomes in toto exstinctus fuit: ergo in aliquo potest exstingui.

Solutio. Dicendum, quod sicut probant ultimae objectiones, fomes in beata Virgine totus exstinctus fuit. Unde Magister in libro III Sententiarum, distinct. III, cap. Quare etiam Mariam Spiritus sanctus in eam praeveniens a peccato prorsus purgavit, et a fomite peccati etiam liberavit. Ex eo patet, quod fomes penitus in ea extinctus luit.

Ad primum ergo dicendum, quod Augustinus de concupiscentia et fomite loquitur prout habet inclinationem ad veniale vel mortale: et etiam auctoritas Joannis vult hoc. Et sic fuit in omnibus qui contrahunt originale, praeterquam in beata Virgine. Unde Augustinus in libro de Natura et gratia tractans idem verbum, sic dicit: " Excepta beata Virgine Maria, de qua propter honorem Domini cum de peccatis agitur, nullam volo quaestionem prorsus haberi. Unde enim scimus, quod ei plus gratiae collatum fuit ad vincendum ex omni parte peccatum, nisi quia concipere et parere meruit Deum, quem nullum constat habuisse peccatum. Hac igitur Virgine excepta, si omnes alios sanctos et sanctas congregare possemus et interrogare, utrum essent sine peccato? quid putamus eos responsuros, nisi quod una voce clamassent: Si dixerimus quoniam peccatum non habemus, ipsi nos seducimus, et veritas in nobis non est . " Fomitem enim habentes, inclinationem habebant et ad veniale et mortale.

Ad aliud dicendum eodem modo, quod in nullo penitus exstinguitur, sed in omnibus est. In parvulis dicitur tantum concupiscibilitas, ut dicit Augustinus, in adultis autem concupiscentia.

Ad aliud dicendum eodem modo, quod Augustinus loquitur ibi de fomite prout est inclinatio ad veniale vel mortale quod facit debitum, pro quo orandum est in hac vita, ut dimittatur.

Ad aliud dicendum, quod Augustinus loquitur ibi de martyribus, in qui-

bus falx martyrii resecat omne peccatum et paenam peccati: et ideo immediate evolant ad visionem Dei, cujus carentia poena est originalis peccati. Ideo dicit eos sine peccato mori, quia moriuntur sine poena debita originali peccato.

Ad aliud dicendum, quod sicut dictum est, ibi loquitur Apostolus in persona hominis damnati. Ille autem damnatus est, qui fomitem habet secundum inclinationem ad veniale et mortale. Unde ibidem Glossa dicit, quod ille ante reparationem gratiae non potest non peccare venialiter: sed ex hoc non sequitur, quin in aliquo possit esse exstinctus, sicut in beata Virgine: quia privilegia paucorum non faciunt legem communem.

Ad ultimum dicendum, quod Bernardus non loquitur ibi de eo in quo fomes est secundum inclinationem ad veniale vel mortale vel utrumque, in quo fomes supprimi potest ne veniat ad consensum, sed exstingui non potest in hac vita. Nihilominus ex hoc non sequitur, quod exstinctus non potest esse secundum privilegium speciale in beata Virgine. In Christo autem non. exstinctus fuit, quia numquam in eo fuit. Et hoc est quod dicit beatus Augustinus in libro de Baptismo parvulorum : " Sola illa medicinam praestare potuit nostro corpori, quae non ex peccati vulnere germen piae prolis emisit. "