COMMENTARIUS.

(h) Ex statuto Ecclesiae, etc. Primo docet Ecclesiam non immutare naturam contractus directe, sed inhabilitare personas ad contractum, et in genere id facit ex ex triplici fine, nempe propter earum propinquitatem, vel ob applicationem earum ad divinum cultum, vel denique tertio propter enorme crimen.

Primi generis est propinquitas sanguinis, et alia vincula, quae naturam ejus sequuntur, ut affinitas, publicae honestatis justitia, cognatio spiritualis et legalis. De consanguinitate agit dist. 40. de affinitate et publicae honestatis justitia dist. 41. de reliquis in prima parte hujus distinctionis, et citat Decreta Bonifacii VIII. quae suo tempore erant jus novum, quod non viderunt antiquiores Theologi, qui praecesserunt Bonifacium. In hoc ergo paragrapho enumerat quinque impedimenta, consanguinitatis, affinitatis, publicae honestatis justitiae, cognationis spiritualis et cognationis legalis, quas vocat mixti juris, id est, participare tam spiritualem quam carnalem cognationem, et vinculum quod ex ipsis est, in quo differunt a tribus prioribus, in quibus tantum attenditur propinquitas carnalis ex propagine, copula aut contractu. Reliqua duo dicuntur propinquitas carnalis, quia in ordine ad conjunctos carne sive per sanguinem, sive per affinitatem in certis gradibus contrahitur; dicitur vero spiritualis, quia in ratione propaginis aut copulae, aut contractus matrimonii rati aut sponsalium, quae ad copulam ordinantur, intervenit, sed ex spirituali, nempe ratione Sacramenti aut adoptionis, quae spiritualia sunt.