ARTICULUS III.

In quo differat detractio a susurratione ?

Tertio quaeritur, In quo differat detractio a susurratione ?

Et videtur, quod in nullo: quia dicunt etiam Sancti, quod detractio est quando per verba occulta denigratur alicujus fama: et idem videtur esse susurratio.

Contra:

1. Super illud Apostoli, ad Roman, i, 29 et 30: Susurrones, detractores, Deo odibiles. Glossa: " Detractores sunt, qui aliorum bona negant vel invertunt: susurrones inter amicos discordiam seminantes. " Ergo differunt susurratio et detractio.

2. Adhuc, Sapient, i, 11: Custodite vos a murmuratione quae nihil prodest, et a detractione parcite linguae: quoniam sermo obscurus in vacuum non ibit. ibi enumerantur tamquam duo. Ergo diffe-

runt.

3. Adhuc, Gregorius super illud Job, xxxix, 25: Exhortationem ducum, sic dicit: " Ab invidia oriuntur odia, detractiones, susurrationes. " Ibi iterum enumerat tamquam diversa. Ergo diversa sunt.

4. Adhuc, Eccli, v, 16 et 17: Non appelleris susurro, ei lingua tua ne capiaris et confundaris: super furem enim confusio et paenitentia, et denotatio pessima super bilinguem: susurratori autem odium, et inimicitia, et contumelia. Ergo videtur, quod differunt: quia ut diversa enumerantur et in textu et in Glossa. Dicit enim Glossa, quod " bilinguis est, qui aliud loquitur de praesente, et aliud de absente. "

Solutio. Dicendum, quod differunt susurratio et detractio, ut dicit Glossa, ad Roman, i, 29 et 30, quae inducta est. Detractio enim diminuit famam aliorum bona negando vel invertendo: susurro autem qui inter amicos seminat discordias, uni de alio mala suggerendo. Propter quod etiam, Proverb, xxiv, 21, dicitur: Cumdetractoribus non commiscearis. Dicit Glossa: " Hoc speciali vitio periclitatur pene totum genus humanum. " Et Hieronymus: " Hoc malum ideo celebre est, quia in multis regnat hoc vitium. " Et adhuc Hieronymus: " Tanta hujus mali libido mentes hominum invasit, ut qui procul ab aliis peccatis recesserunt, in istud quasi in ultimum laqueum diaboli incidant: quia pene ab omnibus libenter auditur. "

Juxta hoc quaeritur, Utrum hoc peccatum fit contra praelatos tantum, vel communiter contra omnes ?

Et videtur, quod contra praelatos tantum.

1. Exod, xxii, 28: Diis non detrahes, et principi populi tui non maledices. Glossa, hoc est, Doctoribus vel sacerdotibus. Ergo videtur, quod fiat contra praelatos tantum.

2. Adhuc, Eccle. x, 20: In cogitatione tua regi ne detrahas, et in secreto eubiliculi tui ne maledixeris diviti. Glossa: " Simpliciter monet ne ira vel levitate majoribus maledicamus, "

Solutio. Dicendum, quod utrumque, scilicet detractio et susurratio fit contra omnes, frequentius tamen contra praelatos et majores, de quibus dicit Augustinus, quod " sunt positi quasi signum ad sagittam. " Et ideo dicit Hieronymus, quod est commune peccatum: lex tamen, et in Ecclesiastico prohibet Salomon ne fiat contra praelatos, quia contra illos frequenter fit.

Et per hoc patet solutio ad totum objectum. Uterque tamen bilinguis, scilicet detractor et susurro: quia aliud loquitur de praesente, et aliud de absente.