ARTICULUS I.

Quid sit gula ?

Ad primum proceditur sic:

i. Dicit Gregorius, quod " gula est immoderatus amor edendi sive sumendi cibum. "

Et haec definitio non videtur esse conveniens: quia cum quatuor modis contingat peccare in gula,, sicut dicit Praepositivus, definitio haec non tangit nisi unum modum. Quinque autem modi tanguntur in hoc versu:

Praepropere, laute, nimis, ardenter, studiose.

Praepropere peccat, qui ante horam prandii cibum sumere desiderat. Contra quod in Evangelio Lucae, xiv, 17, dicitur, quod misit servum suum hora caenae. Et Augustinus in Regula: " Qui non potest jejunare, non tamen extra horam prandii aliquid alimentorum sumat, nisi cum aegrotat. " Adhuc, Isa. v, 11: Vae qui consurgitis mane ad ebrietatem sectandam, et potandum usque ad vesperam, ut vino aestuetis. Adhuc, Eccle, x, 16: Vae tibi, terra, cujus rex puer est, et cujus principes mane comedunt, ad ebrietatem, non ad saturitatem. In hac auctoritate tangitur et quod praepropere et quod nimis: quia nimis est, quod est ad ebrietatem, et ad saturitatem transgreditur.

De hoc quod est laute, dicitur, Amos, vi, 1 et 4: Vae qui opulenti estis in Sion,,,, ingredientes praepropere domum Israel ! ... Qui comeditis agnum de grege, et vitulum de medio armenti, Et est sensus, quod ita laute comedere quaerebant, quod unum agnum vix de grege et unum vitulum, de armento invenirent, quem sibi satis delicatum reputabant. "

De hoc autem quod est nimis, dicitur, I ad Titum, i, 12: Cretenses semper mendaces, malae bestiae, ventres pigri. Glossa: " Ita onerant ventrem, quod pigritiam inducit et vomitum, nimium cibum sumendo. " Daniel, xiv, 5: Non videtur tibi esse Bel vivens deus ? An non vides quanta comedat et bibat quotidie ?

De ardenter, dicitur, Eccli, xxxvii, 32: Non te effundas super omnem escam. Effundere enim animam, est ardenter sumere cibum.

De hoc quod dicitur studiose, vituperatur dives in Evangelio Lucae, xvi, 19: Epulabatur quotidie splendide. Quia studiose fecerat cibos praeparari cum salsamentis et diversis condimentis, quos plus ad delectationem quam ad necessitatem sumebat. Cum ergo definitio non dicat nisi modum in quantitate, videtur insufficiens.

2. Adhuc. Cum peccatum sit corruptio modi, speciei, et ordinis, sicut dicit Augustinus: et definitio non dicat nisi corruptionem modi tantum, videtur insufficiens esse.

Solutio. Dicendum, quod cum dicitur, gula est immoderatus appetitus edendi, sive cibum sumendi, modus sumitur pro generali mensura quae exigitur in quantitate proportionata sufficiente hominis, et in quantitate modi praeparationis, et in quantitate delicationis in cibo et temporis sumendi cibum. Et a privatione generalis modi dicitur gula immoderatus appetitus sumendi cibum.

Ad aliud dicendum, quod licet sit corruptio modi, speciei, et ordinis, tamen specialiter est corruptio modi: quia species et ordo comitantur hunc modum.