MEMBRUM II. De filiabus gulae.

Deinde, Quaerendum est de filiabus gulae, quae secundum Gregorium ponuntur quinque, hae scilicet, inepta laetitia, scurrilitas, immunditia, multiloquium, hebetudo mentis circa intellectum. Isido- rus adjungit duas, scilicet immunditiam et corporis gravitatem, et adhuc somnolentiam et pigritiam.

Hae autem filiae quas ponit Gregorius, sic accipiuntur ex effectu gulae qui proprie est opprimere et oppilare: et hoc est aut in corporalibus, aut in spiritualibus. Si in spiritualibus, aut est in intellectu, aut in effectu. Si in intellectu mentis: sic est hebetudo mentis, quae fit quando cibus vel potus oppilat vias quibus spiritus debent deferre formas ad cellam logisticam, in qua viget operatio, ut dicit Constabenluce in libro de Differentia spiritus et animae. Si est in effectu: aut tunc est in verbis, aut in operibus. Si in verbis: aut in verbis peccantibus secundum turpitudinem, aut multitudinem. Si secundum turpitudinem: tunc est scurrilitas, quando scilicet homo loquitur sicut scurrae, qui turpia pronuntiare consueverunt: et prohibetur ab Apostolo, ad Ephes, v, 4 et 5: Omnis immunditia, aut avaritia, nec nominetur in vobis, sicut decet sanctos: aut turpitudo, aut stultiloquium, aut scurrilitas, quae ad rem non pertinet. Si est in multitudine: tunc est multiloquium. Proverb, x, 19: In multiloquio non deerit peccatum. Ptolemaeus in Proverbiis: " Sapiens est qui refraenat linguam suam ne multum loquatur, nisi cum de Deo loquitur. " Augustinus in libro X de Trinitate: " Scio, Domine, scriptum esse, quod, in multiloquio non deerit peccatum: sed de te loqui quantumlibet homo loquatur, propterea non est multum, quia numquam est satis. " Si autem est in effectu et in opere: tunc est inepta laetitia. Et adhuc si est in opere secundum quantitatem cibi vel potus sumpta: tunc est immunditia, illa scilicet quae est ex vomitu. Isa. xxviii, 7 et 8: Absorpti sunt a vino, erraverunt in ebrietate, nescierunt videntem, ignoraverunt judicium. Omnes enim mensae repletae sunt vomitu sordiumque, ita ut non esset ultra locus. Proverb, xxiii, 29 et 30: Cui vae ? Cujus patri vae ? Cui rixae ?

Cui foveae ? Cui sine causa vulnera ? Cui suffusio oculorum ? Nonne his qui commorantur in vino, et student calicibus epotandis ?

Illa quae ponit Isidorus, sic accipiantur: Dicit enim, quod gula est in comessationibus et ebrietatibus: et constat, quod comessatio est in cibis qui ex multitudine inducunt pigritiam. Ad Titum, i, 12: Cretenses semper mendaces, malae bestiae, ventres pigri. Cibus enim ex qualitate pigritiam inducit et somnolentiam. Propter quod, I Petr, v, 8, Petrus ad vigilias exhortans fratres, praemisit sobrietatem, dicens: Sobrii estote et vigilate. Quasi diceret: Si non estis sobrii, vigilare contra diabolum non potestis. Corporis autem gravitas respicit pigritiam. In praehabitis autem dictum est de qua immunditia intelligitur: quia de corporali et spirituali, ut supra in articulo de ebrietate dictum est .