MEMBRUM II.

Utram, maledictum possit interminari in

creaturam rationalem, et similiter irrationalem ? Deinde quaeritur, Utrum maledictum possit interminari in creaturam rationalem, et similiter irrationalem ?

Et videtur, quod sic.

1. II Reg, ii, 21 et seq., David maledixit montibus Gelboe, ubi ceciderunt fortes Israel, qui tamen irrationales erant,

2. Adhuc, Jerem, xx, 14: Maledicta, dies, in qua natus sum ! Similiter, Job, iii, 3: Pereat dies in qua natus sum, et nox in qua dictum est: Conceptus est homo ! Videtur ergo, quod exemplo justorum maledici possit creatura irrationalis.

3. Adhuc, Videtur etiam rationalis creatura posse maledici: quia dicitur,

Genes, ix, 25: Maledictus Chanaan, servus servorum erit fratribus suis.

Contra:

Creatura irrationalis nullum peccatum potest committere: et in se bona est sicut omnis Dei creatura. Ergo videtur, quod, non debeat maledici. Similiter creatura rationalis: quia tenemur diligere inimicos, et benefacere his qui nos oderunt, cum dicat Apostolus, ad Roman, xii, 17: Nulli malum pro malo reddentes.

Ulterius quaeritur, Si Angelus maius possit maledici ?

Et videtur, quod non.

1. Eccli, xxi, 30: Dum maledicit impius diabolum, maledicit ipse animam suam. Sed nullus debet maledicere animam suam. Ergo nec Angelum malum.

2. Adhuc, Judas in canonica sua, v, 9: Cum Michael Archangelus disputans altercaretur cum diabolo de Moysi corpore, non est ausus judicium inferre blasphemiae, sed dixit: Imperet tibi Dominus. Si ergo Angelo bono non licuit inferre maledictum malo, nec homini licet.

Solutio. Dicendum ad primam partem quaestionis, quod, creatura irrationalis non potest maledici, nec debet, nisi eo modo quo ordinatur ad hominis utilitatem. Unde Gregorius: " Montes Gelboe maledicuntur, ut dum arescente terra fructus non oriuntur, possessores terrae sterilitatis damno feriantur, quatenus ipsi, maledictionis sententiam acciperent, qui apud se mortem regis iniquitate sua exigente meruissent. " Et hoc expresse significatur. Genes, iii, 17: Maledicta terra, non simpliciter, sed in opere tuo. Et quod haec maledictio redundet in hominem, ex hoc patet quod sequitur, dicens Deus ad Cain: Cum operatus fueris eam, scilicet terram, non dabit tibi fructus suos. Et supra, iii, 18, dixit Dominus ad Adam: Spinas et tribulos germinabit tibi.

Ad hoc ergo quod objicitur de Job et Jeremia, qui maledixerunt diem et no- ctem, dicendum quod, dies in quantum

dies ibi non maledicitur, sed natus in die, propter hoc quod cum peccato originali nascitur. Et sic iterum maledictio redundat in hominem, non in diem,

Ad aliud quod objicitur, quod rationalis creatura possit maledici, dicendum quod verum est: quia a Deo ei ab homine habente potestatem potest maledici, sicut in antehabitis probatum est.

Ad id quod contra objicitur de irrationali, jam solutum est: quia ex eo quod, in se bona est, non maledicitur, sed in quantum subjacet operi hominis quod. malum est.

Ad hoc quod contra objicitur de rationali, scilicet quod tenemur diligere inimicos, dicendum quod hoc non probat, nisi quod ex odio et cum malignitate non possumus maledicere: sed qui habet auctoritatem, zelo justitiae potest maledicere, id est, malum paenae interminare, sicut in antehabitis probatum est.

Ad id quod ulterius quaeritur, Si Angelo malo sit maledicendum ?

Dicendum, quod sic zelo justitiae, sed non odio et malignitate: quia sic concordat voluntas hominis cum voluntate Dei.

Ad id quod objicitur de Ecclesiastico, dicendum quod cum maledicit impius diabolum, non directe maledicit animam, sed maledicendam dicit propter similitudinem peccati.

Ad ultimum dicendum, quod non omne maledictum est blasphemia: quia blasphemia est falsi criminis impositio in Deum, et non fit nisi, quando creatura maledicitur in quantum est Dei creatura: quia sic maledictum creaturae redundat in creatorem. Et ita non fuit ausus Michael inferre maledictum diabolo, in quantum est creatura Dei.

Ex dictis patet solutio ejus quod, quidam dicunt, Si maledici possit, cui maledixit Deus, propter verbum Balaam, Numer, xxiii, 8: Quomodo maledicam, cuinon maledixit Deus ?

Patet igitur, quod sic: dummodo probatum sit ei, ut homini judici, et constet ei de, causa maledictionis. Qua probatione non indiget Deus: quia novit corda ho-

minum.

Patet etiam, quomodo maledictum sit blasphemia et maximum peccatum: quod etiam lapidatione secundum leges punitur.

DE DUOBUS PECCATIS QUAE MAXIME IN ACTIONE

VOLUNTATIS CONSISTUNT, SCILICET

DE JUDICIO SUSPICIONIS, ET PERSONARUM

ACCEPTIONE,

Deinde ratione ejus quod dicit Magister in eodem libro II Sententiarum, distinct. XXXV, in illo cap. Ex praedictis colligitur atque infertur, quod mala voluntas ei mala actio in quantum est, bona est.

Quaeritur de duobus peccatis quae maxime consistunt in actione voluntatis, scilicet de judicio suspicionis, et de personarum acceptione.