DISTINCTIO XLVIII.

(Textus Magistri Sententiarum.)

De forma Judicis ?

Solet etiam quaeri, in qua forma Christus judicabit? In forma utique servi judicabit, quae omnibus in judicio apparebit, ut videant mali in quem pupugerunt. Divinitatem vero ejus mali non videbunt; unde Isaias : Tollatur impius, ne videat gloriam Dei. " Humanitatem videbunt, ut timeant, Divinitatem vero non, ne gaudeant. Divinitas enim sine gaudio videri non potest."

Qualis apparebit forma servi ?

Sed cum in forma humana constet eum appariturum, quaeritur, an in forma illa gloriosa appareat, sicut vere est, an in forma, qualis in passione extitit? Quidam putant, a malis talem videri, qualem crucifixerunt, id est, infirmam, quia dicit Scriptura, ut videant, in quem pupugerunt. Sed aperte Augustinus dicit formam servi glorificatam, a bonis et a malis tunc videri, sic : " Cum in forma servi glorificata judicantem viderint boni et mali, tolletur impius, ut non videat claritatem Dei, qua Deus est, quam soli mundo corde videbunt; quod erit eis vita aeterna. " Forma igitur humana in Christo glorificata videbitur a cunctis ; unde et Christus dicitur judicaturus, quia filius hominis est. Ita enim legitur in Evangelio Joannis : Et potestatem dedit ei judicium facere, quia filius hominis est ; non quod ipse ex virtute hominis sit judicaturus, vel quod ipse solus sine Patre et Spiritu sancto sit judicium facturus, sed quia ipse solus in forma servi judicans bonis et malis videbitur. Cum ergo dicitur : Pater non judicat quemquam, sed omne judicium dedit Filio; non ita est intelligendum, quasi Filius solus judicet et non Pater, sed quia forma Filii humana cunctis in judicio apparebit, non infirma, sed gloriosa. Judicabit autem ex virtute divinitatis, non sine Patre et Spiritu sancto, et apparebit terribilis impiis et mitis justis. Erit enim terror malis et lumen justis.

Quare secundum formam servi dicitur Christus suscitaturus corpora ?

Et sicut dicitur Christus secundum formam servi judicaturus, propter causam praemissam, ita etiam dicitur suscitaturus corpora mortuorum secundum humanitatem, cum tamen virtute divinitatis sit suscitaturus, non humanitatis. Sed hac ratione illud dicitur, quia in humanitate suscepit quod est causa nostrae resurrectionis, id est, passionem et resurrectionem. Ideo ei adscribitur secundum hominem suscitatio mortuorum. Unde Augustinus : " Per Verbum, Filium Dei, fit animarum resurrectio: per Verbum, factum in carne filium hominis, fit corporum resurectio. " Item : " Judicat et suscitat corpora non Pater, sed Filius secundum dispensationem humanitatis, in qua est minor Patre Christus. In eo, quod est Filius Dei, est vita, quae vivificat animas, in eo quod est filius hominis, judex est. " Ecce secundum formam humanitatis dicitur suscitaturus corpora et judicaturus;judicaturus autem, quia illa forma cunctis in judicio apparebit, et suscitaturus, quia in eadem forma meritum et causam resurrectionis nostrae suscepit; et quia secundum eamdem formam vocem dabit, qua mortui de monumentis resurgent et procedent. Secundum quod Deus est, vivificat animas, non Pater tantum, quia non tantum Pater vita est, sed et Filius cum eo et Spiritus sanctus eadem vita est, quae pertinet ad animam, non ad corpus. " Corpus enim non sentit vitam sapientiae, sed anima, quae illuminatur a lumine aeterno ". Licet igitur Christus potentia divinitatis vivificet animas et suscitet corpora et judicet ; non otiose tamen et praeter rationem ei secundum formam Dei tribuitur vivificatio animarum, et secundum formam servi judicium et resuscitatio corporum.

De loco judicii.

Putant quidam, Dominum descensurum in vallem Josaphat in judicio, eo quod ipse per Joelem

Prophetam sic loquitur : Congregabo omnes gentes et deducam eas in vallem Josaphat, et disceptabo ibi cum eis. In cujus capituli expositione ita reperi : " Hoc quidam pueriliter intelligunt, quod in valle, quae est in latere montis Oliveti, descensurus sit Dominus ad judicium, quod frivolum est, quia non in terra, sed in spatio hujus aeris sedebit contra locum montis Oliveti, ex quo ascendit. Et sicut Joannes Chrysostomus dicit, Angeli deferent ante eum signum crucis "; unde in Evangelio Veritas ait : Et tunc apparebit signum filii hominis, etc. Josaphat autem interpretatur judicium Domini; in vallem ergo Josaphat, id est, judicii Domini, congregabuntur omnes impii. Justi vero non descendent in vallem judicii, id est, damnationis, sed in nubibus elevabuntur obviam Christo.

De qualitate luminarium et temporis post judicium.

Veniente autem ad judicium Domino in fortitudine et potestate, magna, Sol et Luna dicuntur obscurari, non sui luminis privatione, sed superveniente majoris luminis claritate. Virtutes quoque coelorum, id est, Angeli, dicuntur moveri, non metu damnationis vel aliqua perturbatione pavoris, sed quadam admiratione eorum quae viderint. Unde Job : Columnae coeli pavent adventum ejus. Ante diem vero judicii Sol et Luna eclipsim patientur, sicut Joel testatur dicens : Sol convertetur in tenebras, et Luna in sanguinem, antequam veniat dies Domini magnus et horribilis; magnus vero dicitur, propter magna, quae ibi fient. Cum autem factum fuerit coelum novum et terra nova, tunc erit lux Lunae sicut lux Solis, testante Isaia : Et lux Solis septempliciter, id est, sicut lux septem dierum, quia quantum luxit Sol in prima conditione septem dierum ante peccatum primi hominis, tantum lucebit post judicium. Minorata enim fuit lux Solis et Lunae aliorumque siderum per peccatum primi hominis; sed tunc recipiet Sol mercedem sui laboris, quia septempliciter lucebit; et tunc non erit vicissitudo diei et noctis, sed tantum dies. Unde Zacharias : Et erit dies una, quae nola est Domino, non dies neque nox, et in tempore vesperoe erit lux, quia non erit tunc varietas diei et noctis, quae modo est, sed continua dies et lux. Isaias tamen videtur dicere, quod tunc non luceat Sol vel Luna, loquens congregationi Sanctorum : Nm. erit ibi, inquit, amplius Sol ad lueendum per diem, nec splendor Lunae illuminabit te;sed erit tibi Dominus in lucem sempiternam. Sed his verbis non negat, Solem et Lunam tunc lucere, sed significat, his qui tunc erunt in aeterna beatitudine, nullum lucis usum praestare; quia ut ait Hieronymus super eumdem locum : "Coeli terraeque, Solis atque Lunae nobis cessabit officium, et erit ipse Dominus lumen suis in perpetuum. " Potest etiam intelligi illud Isaiae, ea ratione dictum, quia Sol et Luna tunc non habebunt ortum et occasum, sicut nunc. Unde Isidorus illud Isaiae quasi exponens, ait: " Post judicium Sol laboris sui mercedem suscipiet: " unde Propheta : Lucebit septempliciter, et non veniet ad occasum, nec Sol nec Luna, sed in ordine, quo creati sunt, stabunt, ne impii in tormentis sub terra positi fruantur luce eorum. Unde Habacuc : Sol et Luna steterunt in ordine suo. Ecce aperte dicit, Solem et Lunam tunc lucere, sed stabiliter permanere; ubi etiam significat, Infernum esse sub terra. Si vero quaeritur, quis sit usus lucis Solis et Lunae tunc. fateor me ignorare, quia in Scripturis non memini me legisse.

(Finis textus Magistri. )