Albert the Great, Commentarii In Psalmos

Dicit ergo : Sic expandi tota die manus meas, sed " numquid, " o Deus Pater, " mirabilia, " quae facies per me, et in me, " facies mortuis ? " non corpore (talibus enim sunt facta multa, filiae Archisynagogi, Matth.IX, 18 et 19. Et filio viduae, Luc. VII, 11-16. Et quatriduano Lazaro, Joan.XI, 1 et seq.) sed anima ? Quasi dicat : Non : nullam enim in semetipsis habentes vitam, miracula irrident, et non credunt : et sic coram ipsis fiunt, sed non ipsis. Tales sunt mortui, de quibus in Psal. cxlii, 3 : Collocavit me in obscuris, sicut mortuos saeculi. Et Apocalyps.III, 1 : Nomen habes, quod vivas, et mortuus es,

" Aut " supple, nunquid, " medici, " Apostoli scilicet mei, et subsequentes praedicatores, et praelati, " suscitabunt, " supple, tales mortuos, et sic " confitebuntur tibi, " confessione laudis? Quasi diceret: Non : quia de talibus scriptum est in Psal. VI, 6 : Quoniam non est in morte, qui memor sit tui. Et ibidem : In inferno autem, in obstinatione, in peccato, quis confitebitur tibi ? Quasi diceret: Nullus. Eccli.XVII, 26 : A mortuo, quasi nihil, perit confessio. Medicos ergo hic appellat praedicatores, et praelatos.

Notandum enim, quod est medicus naturalis, qui curat corpora per artem medicinae ad litteram. Eccli.XXXVIII, 1 : Honora medicum, propter necessitatem. Et est spiritualis malus, scilicet Philosophus qui vana docet et inutilia. Luc. VIII, 43, de muliere, quae expenderat omnia bona sua in medicos, et semper deterius habebat , Anima scilicet quae expendit omnia naturalia in Philosophos scrutandos, nec sanatur. Sed bonus est medicus, Praelatus, qui habet artem medicandi, sacram scientiam, et medicamina, scilicet sacramenta, Jerem, viii, 22 : Numquid resina non est in Galaad ? aut medicus non est ibi ? Alioquin, dicat illud lsa. iii, 7 : Non sum medicus, et in domo mea non est panis , neque vestimentum : nolite constituere me principem populi. Genes. l, 2 : Praecepit J oseph servis suis medicis, ut aromatibus condirent patrem. Sed est optimus medicus, qui solo sanat verbo, imo solo nutu et voluntate. Matth.IX, 12: Non est opus valentibus medicus, sed male habentibus. Luc. iIV, 23 : Utique dicetis mihi hanc similitudinem: Medice, cura teipsum. Augustinus : " Magnus de " caelo venit medicus, quia malus in ter-" ris jacebat aegrotus. " Hic est Christus, qui est salus .

" Numquid narrabit. " Hic secundum, in quo idem dicit per alia, sicut dictum est : " Numquid narrabit aliquis, " supple, existens, " in sepulcro ? " hoc est, anima existens in peccato, quae corpus suum habet ut sepulcrum, quales erant illorum animae, quibus Dominus dicebat : Vae vobis Scribae et Pharisaei hypocritae : quia similes etsis sepulcris dealbatis, etc. : " Misericordiam tuam ? " Quasi diceret : Non. Psal. XXIX, 10 : Numquid pulvis, impius qui tanquam pulvis in sepulcro latet in corpore specioso, confitebitur tibi ? Quasi diceret : Non. Psal.I, 4 : Non sic impii, non sic, sed tamquam pulvis. " Et, " supple, existens, " in perditione, " numquid annuntiabit " veritatem tuam. " Quasi diceret : Non : non enim veritati credunt, quare nec ipsam nuntiabunt. Si enim alii peccatores, etiamsi fideles excluduntur, quanto magis infideles et obstinati? de qui-

bus hic loquitur. Psal, xlix, 16 : Peccatori autem dixit Deus : Quare tu enarras justitias, etc. Eccli. xv, 9 : Non est speciosa laus in ore peccatoris. Eccli.XXVIIi, 14 : Narratio peccantium odiosa. Propter hoc primo mundantur labia Isaiae (VI, 6 et seq.) et tunc mittitur ad praedicandum. Et Jeremiae dictum est in cap. I, 4 : Priusquam te formarem in utero, novi te : et antequam exires de vulva, sanctificavi te, et sic prophetam in gentibus dedi te. Positi ergo in sepulcro, et in perditione, non narrant misericordiam et veritatem : quia nemo contra se libenter loquitur. Prius ergo necesse est ut suscitetur, et tunc loquetur. Luc. vii, 15 : Et resedit qui erat mortuus, et coepit loqui.

" Numquid cognoscentur. " Hic quarto nomine vocantur, scilicet nomine tenebrarum : quia " numquid etiam mirabilia tua, " quae per me operaris, " cognoscentur in tenebris ? " In peccatoribus, qui non tantum sunt tenebrosi, sed magis tenebrae, alios scilicet obtenebrantes pravis exemplis suis. Joan. I, 5 : Lux, Christus, in tenebris lucet, in peccatoribus scilicet tenebrosis, et alios obscurantibus : et tenebrae eam non comprehenderunt. II ad Corinth. VI, 14 : Quae societas luci ad tenebras ? Propter hoc monet Ecclesiastes, xii, 1 et 2 : Memento creatoris tui,... antequam tenebrescat sol.

" Ei justitia. " Ecce quintum. Numquid, supple, cognoscetur, " in terra oblivionis, " in terreno scilicet corde, et a te oblivioni tradito, vel tui oblito, juxta illud Psal. xxx, 13 : Oblivioni datus sum, tamquam mortuus a corde. Nota ergo, quod mortui dicuntur reprobi, quibus opera Christi non prosunt : mortui per mortalem culpam, sepulti per pravam consuetudinem, sed perditi per obstinationem in culpa, tenebrosi per peccati divulgationem, et terra oblivionis per contemptum et desperationem. Res enim quae contemnitur, cito traditur oblivioni. III non intellexerunt mirabilia, quae Christus in terris fecit, nec illa, quae adhuc facit in impii justificatione. Quis enim nesciat, quod in impii justificatione claudo restituitur gressus, manco manus, caeco visus, surdo auditus, et muto loquela : leprosus mundatur, paralyticus confirmatur, daemoniacus liberatur, et tandem mortuus suscitatur?

" Et ego ad te. " Hic est secunda pars totius hutius Psalmi, in qua orat pro membris, se tamen non excluso. Membris, inquam, patientibus, sicut ipse a malis passus, et sic respondentibus ipsi, sicut in titulo tactum fuit.

Primo ergo tangitur petitio. Secundo, persuasio, ibi, " Pauper sum ego. "

In prima duo. Primo, petitio. Secundo, conquestio de dilatione petiti, ibi, " Ut quid, Domine ? "

In prima duo. Primo tangitur devotio petentis. Secundo, instantia orationis, ibi, " Et mane. "