Albert the Great, Commentarii In Psalmos

Dicit ergo : Sic afflicti sumus in anima: et quantum ad corporalem vitam nostram, " anni nostri, " id est, vita nostra, vel nos viventes in annis, " meditabuntur, " active, hoc est, cogitabimus, " sicut aranea, " quae non meditatur, nec laborat, nisi in vanitate telae, et dolositate, ut inde capiat muscam. Vel passive : et differt parum sensus. " Anni nostri, " sicut prius, " meditabuntur, " id est, ab aliis meditantibus, et attendentibus reputabuntur, " sicut aranea, " id est, aranearum vita, quae tota inutilis est, et vana. Isa. lix, 5 : Telas araneae texuerunt. Et ibidem, f. 6 : Telae eorum non erunt in vestimentum. Multorum scholarium meditatio, sicut aranearum est, quia toti sunt in curiositatibus perscrutandis, Astronomiae, et Geomantiae, et eorum quae nihil utilitatis habent, sed totum est vanitatis et curiositatis. 11 ad Timoth. ii, 23 : Stultas et sine disciplina quaestiones devita : sciens quia generant lites. Et sunt tales sicut araneae recte inflati et timidi. I ad Tim. VI, 4 : Superbus est, nihil sciens, sed languens circa quaestiones, ei pugnas verborum : ex quibus oriuntur invidiae, contentiones, blasphemiae, suspiciones malae.

Sic multorum cupidorum sunt meditationes sicut araneae : subtiliter enim exquirunt, et totos se eviscerant in exqui- rendis novis modis acquirendi, et contractuum diversis laqueis et usurarum. Luc. XVI, 8 : Filii hujus saeculi prudentiores filiis lucis in generatione sua sunt. Et bene comparantur araneae. Aranea enim texit fila subtilia, et ad invicem juncta. Sic avarus curiositatem curiositati jungit, et sic quasi ad capiendum aliquid telam facit. Isa.XIX,9 : Confundentur qui operantur linum, plectentes et texentes subtilia. Et eruit viscera. Sic avarus totum se eviscerat in acquirendo. Eccli. x, 10: Nihil est iniquius quam amare pecuniam: hic enim et animam suam venalem habet : quoniam in vita sua projecit intima sua. Irretit fraude sua miseram muscam. Sic avarus verbis suis et fallaciis pauperem. Prov. VII, 21 : Irretivit eum multis sermonibus suis. In tela, quam facit, est ejus fiducia tota. Sic avarus in iis quae acquirit. Job, viii, 14 : Tela aranearum fiducia ejus. Suspendit se in tela sua. Sic avarus totus suspenditur in labore suo et angustia sua. Esther, vii, 10 : Suspensus est Aman in patibulo quod paraverat Mardochaeo. Ob hoc voluit Dominus Judam suspendio interire. Act. I,18 : Et suspensus crepuit medius. Tabescit suspensa in illa. Sic avarus totus tabescit suspensus in amore suorum. Psal. xxxviii, 12 : Tabescere fecisti sicut araneam animam ejus. Et tandem valde cito perit totus labor, et confidentia sua ad modicum flatum. Sic avarus cito perdit omnia. Osee, viii, 6 : In aranearum telis erat vitulus Samariae, qui erat eorum spes et confidentia "

" Dies, " Hic secundum. Quasi diceret: Sic sunt in vano labore dies nostri, et sunt pauci, quia " dies annorum " complentur " in ipsis septuaginta annis. " Vel, secundum aliam litteram quae habet, " Anni, " sic construe : " Diesannorum nostrorum, " Hoc proponitur ut locum habeat sequens relatio, " In ipsis diebus annorum nostrorum, " supple, sunt, septuaginta anni. " Primum quidem, antequam peccata essent multiplicata, erant anni octingenti, nongenti, sed multiplicato peccato, et facto diluvio breviati sunt. Genes. VI, 3 : Erunt dies illius, scilicet hominis, centum viginti annorum. Postea quasi in medietate decurtati,facti sunt septuaginta. Ergo mali sunt, quia araneae, et breves, quia septuaginta. Gen. xlvii, 9, dicit Jacob : Dies peregrinationis meae centum triginta annorum sunt, parvi, et mali,

" Si autem in potentatibus . " Hic est tertium, scilicet afflictio in extensione ultra numerum taxatum.

Ait enim: Sic sunt anni vitae anni septuaginta, " si autem octoginta anni, " supple, sunt, " in potentatibus, " in illis scilicet, qui multum possunt, et fortem et potentem habent naturam, " et amplius eorum " (conjunctio superfluit, sicut frequenter accidit in Hebraeo) " erit labor " in agendo, " et dolor " in patiendo.

Sed contra hoc videtur Josue, XIV, 10, 11: Hodie octoginta quinque annorum sum, sic valens, ut eo valebam, tempore, quo ad explorandum missus sum. Respondeo. Speciale donum fuit, et gratia specialis. Tamen nec adhuc illo tempore in tantum erat natura infirmata, et debilitata, sicut tempore David. II Reg. XIX, 35, de Berzelai, qui octogenarius erat, et dixit : Numquid vigent sensus mei ad discernendum suave vel amarum ? Eccli. xviii, 8 : Numerus dierum hominum ut multum centum anni.

Sed iterum: Quomodo dicitur quod ultra octoginta labor et dolor ? nonne similiter ante ? Constat, quod sic: quia Genes. iii, 17, dictum est primo homini, et nobis in illo : In laboribus comedes ex ea, scilicet terra, cunctis diebus vitae tuae. Respondeo. Verum est, quod semper in labore et dolore, Job, v, 7 : Homonascitur ad laborem, et avis ad volatum. Sed tunc praecipue est in miseria cum calor naturalis in ipso refriguerit. I Reg. III, 2, de Heli, cujus oculi caligaverunt, nec poterat videre, III Reg. I, 1, de David qui non poterat calefieri. Et dixit quidam : " Multa senem circumveniunt " incommoda. " Propter hoc dicitur, Eccle. XII, 1-3 : Memento creatoris tui in diebus juventutis tuae, antequam veniat tempus afflictionis, et appropinquent anni, de quibus dicas : Non mihi placent. Antequam tenebrescat sol, et lumen, et luna, et stellae, et revertantur nubes post pluviam: quando commovebuntur custodes domus, et nutabunt viri fortissimi, et otiosae erunt molentes in minuto numero, et obtenebrescent videntes per foramina.

Nota etiam lecturas alias mysticas, quae sunt in Glossa.

" Quoniam supervenit, " Hic secundum illius partis, in qua agitur de paena in relatione ad causam paenae. Actum est enim in relatione ad justitiam, hic in relatione ad misericordiam. Duo autem dicuntur. Primo, ratio inflictionis paenae, Dei misericordia ad corripiendum. Secundo, admiratio Prophetae super tantum beneficium, et tam districtum. Primo, quoad bonos. Secundo, quoad malos, ibi, " Quis novit potestatem ? "