Scholium.

Dari dotem claritatis, ex Sap. 3. et habetur Matth. 13. et 17. ubi de transfiguratione, et ad Phil. 3. ibi, reformabit corpus configuratum corpori claritatis suae. De hac Ruff. in Symb. Clem. lib. 1. const. cap. 8. August. 3. doct. cap. 5. et 2. de consen. Evang.cap. 56. Greg. 18. mor. 31. Hieron. epist 103. ad Paulin. et in Amos 5. Ambr. et Anselm. in 1. Gor 15. Putat Doct. hanc consistere in perfectissimo colore cum refulgentia, et forte cum luce, si corpus humanum est lucis capax.

(a) Respondeo et dico quod corpora beata erunt clara. Claritas enim est quaedam refulgentia, et addit super lucem et colorem, manifestationem sui, quomodo dicitur clara lux, vel clara veritas, vel clara intellectio, id est, manifesta, pro quanto dicit perfeetam manifestationem sui. Si ergo loquamur de claritate coloris sui corporis, dico quod corpora beatorum erunt clara, quia habebunt perfectam manifestationem sui corporis; habebunt enim colorem perfecte manifestativum sui, quia quilibet habebit colorem pulchrum secundum gradum complexionis suae, quia non omnes habebunt eumdem colorem, nec secundum eumdem gradum qui habent similem colorem, quia commensurationes colorum sequuntur commixtionem propriarum qualitatum ;et ideo secundum diversas complexiones habebunt diversos colores ; unde et modo magis delectatur unus in uno colore quam in alio, quia conveniens est complexioni suae, et sic non omnes erunt aeque clari, etiam habentes sibi similem complexionem, sed secundum merita sua. Unde secundum Apostolum : Alia est claritas So lis, etc. et illa claritas videtur sufficere, quia magis delectatur sensus visus hominis in pulchro colore corporis humani quam in corpore luminoso: unde plus delectatur naturaliter in videndo faciem humanam bene coloratam quam Solem. Ille ergo modus claritatis est mihi planus, quod erit in beatis, quia in eis erit color secundum ultimam perfectionem convenientem complexionibus suis. Si autem corpus beati sit capax lucis, et non tantum coloris, placet mihi, quod ponatur ibi. Talem autem colorem, scilicet ultra perfectionem complexionis suae cum refulgentia, talem esse dotem claritatis voco.