Albert the Great, Commentarii In Psalmos

Dicit ergo : Sperandum est in Deo, quia praedicta bona fecit mihi, et etiam faciet adhuc alia, quia, o tu quicumque es in adversitate et ardore tentationis, " ipse obumbrabit tibi, " refugium tribuendo, "scapulis suis, " propriis. Psal. cxxxix, 8 : Obumbrasti super caput meum in die belli. Luc. I, 35 : Virtus Altissimi obumbrabit tibi. Ecce scapulae, in quibus portatur onus, haec umbra, quam desiderabat sponsa Cant, II, 3: Sub umbra illius, quem desideraveram, sedi : et fructus ejus, etc. Isa, IV, 6 : Erit in umbraculum diei ab aestu. Non est haec umbra hederae, vel cucurbitae, quae statim super caput Jonae exaruit .

Sed quia posset aliquis mirari, quomodo scapulis possit obumbrare, ideo exponit se, " et sub pennis ejus, " quae protegunt a parte anteriori, " sperabis, " hoc est, sperare poteris. Alas appellat quod dixerat scapulas. Pennas de quibus supra, Psal. lvi, 2 : In umbra alarum tuarum sperabo, donec, etc, et Mal. IV, 2 : Sanitas in pennis ejus. Hinc est quod comparat se gallinae sub alis pullos suos congreganti. Matth. xxiii, 37 : Quoties volui congregare filios tuos, quemadmodum gallina congregat pullos suos sub alas, etc. Item, scapulae possunt referri ad operationem mirabilium Dei. Per operationes enim virtus ostenditur, sicut per scapulas hominis fortitudo. In alis autem, quae in altum avem sublevant, prophetica et legalis instructio.

" Scuto circumdabit te. Hic secundum, in quo promittit, quod defendet potenter : quod potest notari in scuto.

Ait enim : Sic scapulis et alis proteget te bensgniter, et etiam potenter, quia " veritas ejus, " quae personas non accipit, sed omnes in se sperantes protegit. Ad Hom. II, 11 : Non enim est acceptio personarum apud Deum, " Circumdabit te scuto " potentiae et virtutis suae. II Reg. xxii, 3 : Deus fortis meus, sperabo in eum : scutum meum, ei cornu salutis meae. Hoc autem scutum est recordatio passionis et laboris Christi, qua protegit ab omni malo, secundum illud Thren. III, 65 : Dabis eis scutum cordis laborem tuum. Et in Psal. v, 13 : Scuto bonae voluntatis tuae, qua pro nobis mori et pati voluisti, coronasti nos, ut nos defenderes ab hoste,

" Non timebis a timore. " Hic secundum, in quo post diversitates liberationum, subjungit de diversitate tentationum, a quibus liberat : et dicuntur quatuor secundum quatuor tentationum genera, a quibus liberat. Prima est levis et occulta, de qua primo. Secunda, levis et aperta, de qua secundo, ibi, " A sagitta volante, " Tertia, gravis et occulta, de qua tertio, ibi, " A negotio perambulante in tenebris. " Quarta, gravis et aperta, de qua quarto, ibi, " Ab incursu. "

Vel sic : Primo promittit liberationem ab illa quae accidit ex timore adversitatis. Secundo, ab illa quae ex. blandimento prosperitatis. Tertio, ab illa quae ex subreptione vel ignorantia. Quarto, ab illa quae ex coactione et violentia : et signantur in eisdem locis. Homo enim ruit in peccatum, vel quia timet, vel quia allicitur, vel q uia i gnorat, vel quia cogitur.