Albert the Great, Commentarii In Psalmos

Dicit ergo : Sic vos, Judaei, venite ad exsultandum in Domino, et coram ipso plorandum. Et vos Gentiles, " cantate Domino, " Deo Patri, Judic. v, 3 : Ego sum, ego sum quae Domino canam. Isa. xII, 5 : Cantate Domino, quoniam magnifice fecit. Sed quid canemus ? " Canticum novum. "

Nota, quod canticum novum cantat, qui exuto veteri homine, et per gratiam innovatus, exsultat. Hoc autem fit tripliciter. Prima enim innovatio fit per baptismum, in quo submersis aegyptiis, et filiis Israel liberatis, et per aquam innovatis, cantandum est illud Canticum, Exod. xv, 1 : Cantemus Domino, gloriose enim magnificatus est. Secunda est per paenitentiam, de qua in Psal. cII, 5: Renovabitur, ut aquilae, juventus tua. Et ad Ephes. Iv, 23 : Renovamini spiritu mentis vestrae. Sic renovatis cantandum est canticum Judith, in cap. xvI, quod interpretatur confitens. Tunc cantavit canticum hoc Judith Domino, dicens : Incipite Domino in tympanis. Tertia vero innovatio, erit tandem per glorificationem, Apocal. xxI, 5 : Ecce nova facio omnia. Et tunc cantabitur illud Apoc. xIv, 3 : Cantabant quasi canticum novum ante sedem Dei et Agni.

Canticum veteris hominis, non est recte dicendum canticum novum, nec etiam canticum, sed grunnitus porcorum super escas, quamvis ipsis non videatur. Amos, vI, 5 ei 6 : Qui canitis ad vocem Psalterii, sicut David putaverunt se habere vasa cantici. Bibentes vinum in phialis et optimo unguento delibuti : et nihil patiebantur super contritione Joseph. Hinnitus equorum in foeminas. Jerem, v, 8 : Equi amatores, scilicet in foeminas, et emissarii facti sunt.Unusquisque ad uxorem proximi sui hinniebat,

" Cantate. " Ecce secundum. Quasi

1 diceret : Sic cantate Deo Patri, canticum novum : et etiam o vos, " omnis terra, " idem canticum " cantate Domino, id est, Filio : justum enim est, ut cantetur ipsi, qui se novum fecit hominem, canticum novum. Jerem, XXXI, 22 : Creavit Dominus novum super terram: Foemina circumdabit virum. Qui novum dedit charitatis mandatum. Joan, xiii, 34 : Mandatum novum do vobis : ut diligatis invicem. Qui ipsum cor, quo sibi vult cantari facit novum. Psal. CIII, 30 : Renovabis faciem terrae. Ezech. XXXVI, 26 : Dabo vobis cor novum, et spiritum novum. Bene antem omnis terra invitatur, quia in natura humana, Filio Dei unita, per Apostolos ad fidem generaliter invitatur. Psal. lxv, 1 : Jubilate Deo omnis terra. Et alibi. : In omnem terram exivit sonus eorum .

" Cantate Domino. " Hic tertium.

Glossa : " Spiritui sancto. " Huic cantandum novum canticum : quia novus, id est, innovans est Spiritus. Psal. l, 12 : Spiritum rectum innova in visceribus meis. Et faciens cantare in abundantia tribulationum illos quos replet, Act. v, 4:1. : Ibant Apostoli gaudentes a conspectu concilii, quoniam digni habiti sunt pro nomine Jesu, contumeliam pati. Et Jacob. I, 2 : Omne gaudium existimate, fratres mei, cum in tentationes varias incideritis. Et in spe aeternorum, ad Rom. XII, 12: Spe gaudentes. Propter hoc dicitur, I Reg. ii, 3 : Recedant vetera de ore vestro, noxiae scilicet cantilenae. Et in Psal. cxxxvi, 3 : Hymnum, cantate nobis de canticis Sion,

" Et benedicite. " Hic secundum, in quo postquam monuit ad laudem divi- nitatis, monet ad laudem humanitatis. Quasi diceret : Sic cantate divinitatem commendando, et benedicite nomini ejus, quod est Jesus, humanitati impositum, et . cui benedicendum, quia in. ipso solo salus, et benedictio. Act, IV, 12 : Nec aliud nomen est sub caelo datum hominibus, in quo oporteat nos salvos fieri. Ad Philip. ii, 9 et 10 : Donavit illi nomen, quod est super omne nomen : ut in nomine Jesu, etc.

" Annuntiate de die. " Hic secundum, in quo postquam actum est de laude, subjungitur de praedicatione : in quo dicuntur duo. Primo, monet Praelatos ad. praedicandum, Secundo, subditos ad obediendum praedicationi, ibi, " Afferte Domino. "

In prima duo. Primo, invitantur ad praedicationem. Secundo, fructus praedicationis ostenditur, ibi,. " Confessio et pulchritudo. "

In prima duo. Primo, invitat Praelatos ad laudem humanitatis Christi. Secundo, divinitatis, ibi, " Quoniam magnus Dominus. "

In prima tria. Primo, invitat ad praedicationem fidei passionis. Secundo, fidei gloriosae resurrectionis, ibi, " Annuntiate inter gentes gloriam ejus. " Tertio, ad praedicandum mirabilia Ascensionis, ibi, " In omnibus populis. "