Albert the Great, Commentarii In Psalmos

Dicit ergo : Sic, Domine, peto, et hoc potes, et debes, quia o " tu, Domine, " non alius : " fundasti, " fundatam et stabilem creasti, " terram, " ad litteram, " et opera, manuum tuarum, " tuae scilicet potentiae, " sunt caeli. " Verum est, Genes. I, 1 : In principio creavit Deus caelum et terram, Isa. xlviii, 13 : Manus mea fundavit terram, et dextera mea mensa est caelos. Et, li, 13 : Tetendit coelos, et fundavit terram. Vel, si est in textu, " initio, " tunc legendum: " Fundasti terram initio, " id. est, per initium, scilicet Filium. Sapient. VIII, 27 et 30 : Quando praeparabat caelos, aderam... Cum eo eram cuncta componens. Et Glossa hoc modo exponit verba Genes. I, 1 : In principio creavit Deus caelum et terram,

" Ipsi peribunt. " Hic secundum, in quo ostendit corruptionem creatorum : et dicuntur duo. Primo, corruptio. Secundo, modus in corrumpendo, ibi, " Et omnes sicut, "

In prima duo. Primo, ipsorum corruptio. Secundo, ne forte crederet quis

Deum cum iis corrumpi, obviat opinioni falsae, ibi, " Tu autem permanes ?

Ait ergo : Sic creasti caelos, et tamen " ipsi peribunt, " secundum formam in qua nunc sunt, non secundum substantiam suam.I ad Corinth.vii,31 : Praeterit figura hujus mundi. Quasi diceret: Non substantia. Eccle. I, 4 : Generatio praeterit, generatio advenit, terra autem in aeternum stat : multo ergo fortius caelum.

" Tu autem permanes : " cum his non peribis, sed ipsa tenebis in eo quod erunt, aliter penitus defluerent in nihilum. Gregorius : " Essentia eorum ad nihilum " omnino tenderet, nisi actor omnium " manu regiminis eam teneret. " Malach. iii, 6 : Ego Dominus, et non mutor. Eccli. XLII, 17 : Nonne. fecit Dominus sanctos enarrare omnia mirabilia sua, quae confirmavit Dominus omnipotens stabiliri in gloria sua ?

" Et omnes. " Ecce secundum, in quo subjungit transeundi modum.

Ait enim : Sic caeli peribunt, " et omnes veterascent, " priorem formam amittent, " sicut vestimentum, " longo usu primam amittit formam. Sed quomodo dicit, sicut vestimentum ? vestimentum paulatim et successive formam amittit, sed illa subito amittent. Isa. li, 6 : Caeli sicut fumus liquescent. Ii Petr. III, 10: Caeli magno impetu transient. Responsio posset esse, quod non attenditur similitudo quantum ad modum in pereundo, sed quantum ad id quod perire debet. Quasi diceret : Sicut ibi forma, sic hic. Vel haec similitudo sumitur quantum ad id propter quod totum dicitur, quantum scilicet ad hominem, in quo omnia mutabuntur sicut vestimentum. Compositum enim est humanum corpus ex omnibus, et ipsum animae vestimentum. Job, x, 11 : Pelle et carnibus vestisti me, ossibus, etc. Hoc autem mutabitur, et omnia elementa superiora quae per caelos, inferiora quae per terram intelliguntur.

" Et sicut opertorium. " Hic secundum, in quo ostendit corruptorum reparationem in meliorem formam, et hoc per duplicationem immutationis, et exemplum. ''

Ait enim : Sic dico, quod peribunt,sicut vestimentum veterascendo, hoc est, primam formam amittendo. " Et mutabis eos sicut opertorium, " mutatur ab homine in melius, " et mutabuntur, " in veritate non destruentur. Hinc sumpsit Paulus quod dixit ad Hebr. I, 12 : Velut amictum mutabis eos, et mutabuntur. II Petr. III, 13 : Novos caelos, et novam terram secundum promissa ipsius expectamus. Apocalyps. XXI, 1: Vidi caelum novum, et terram novam.

" Tu autem idem ipse es. " Dicta rerum mutabilitate, hic subjungitur de Dei immutabilitate, a qua est illa mutabilitas : et ostenditur non esse ex mutatione aliqua primo. Et non tendere in mutabilitatem aliquam secundo, ibi, " Et anni. "

Ait enim : Sic meliorabuntur alia, in quo mutabuntur : " tu autem, " illorum immutator et meliorator, " idem ipse es, " non mutatus ex priori. Exod. III, 14 : Ego sum qui sum : non qui fui, vel ero.

" Et anni tui, " duratio scilicet tua, " non deficient, " ut muteris in aliud, vel tendas in non esse. Gregorius: " An-" ni ejus non deficiunt, quia sicut ejus " aeternitas nullo initio incipit, ita nullo " fine terminatur. "

Et nota hic, quod est opertorium bonum, charitas. Proverb. x, 12 : Universa delicta operit charitas. Et, I Petr. IV, 8 : Charitas operit multitudinem peccatorum. Paenitentia. Josue, II, 6 : Operuit eos stipula lini, id est, humili confessione, et paenitentia peccati. Sic loquitur paenitens, ubi dicit in Psal. XXXI,l : Beati quorum remissae sunt iniquitates. Verecundia. Unde de Rebecca dicitur, Genes. XXIV, 65 : At illa tollens pallium suum, tamquam verecunda, operuit se. Taciturnitas. Numer. XIX,15 : Vas,quod non habuerit operculum aut ligaturam desuper, immundum erit. Tribulatio. Genes. VII, 19 : Operti sunt, scilicet aquis diluvii, omnes montes excelsi sub universo caelo. Sed malum est triplex. Culpae, scilicet hypocrisis. Zachar. xiii, 4 : Nec operientur pallio saccino, ut mentiantur. Ignorantiae. Exod. XIX, 16 : Nubes densissima operuit montem. Paenae aeternae. Isa. XIV, 11 : Subter te sternetur tinea, et operimentum tuum erunt vermes.''

" Filii servorum. " Hic est tertium principale hujus partis. Postquam praecessit supplicatio pro adeptione aeternitatis, et persuasio ut sibi acquiescatur, hic subjungitur conclusio laeta, quod sic fiet ut petitum est : et dicuntur duo. Primo, quod Apostolorum successores ad aeternitatem et immutabilitatem transferentur. Secundo, tangit meritum translationis, scilicet bonas operationes, ibi, " Et semen eorum. "