Albert the Great, Commentarii In Psalmos

Dicit ergo : Sic magnificatus es, quantum ad superbiam : et etiam " qui, " id est, quia tu " fundasti terram. " Isa. xlviii, 13 : Manus mea fundavit terram, etc. Et si Dominus fundavit terram, et hoc, " super stabilitatem suam, " id est, dedit ei propriam naturam et stabilitatem, propter quam stat tamquam ab illa sustentata, et in illa fundata. Haec autem stabilitas est forte humiditas, per quam stat. Infra, in Psal. cxxxv, 6 : Qui firmavit terram super aquas. Et supra, Psal. xxiii, 2 : Super maria fundavit eum, etc, orbem scilicet terrarum.

" Non inclinabitur, " quin stet fortiter, " in saeculum saeculi, " hoc est. in aeternum. Contra, Luc. XXI, 33 : Caelum et terra transibunt, verba autem mea, etc. Respondeo : Transibunt non ut non sint, sed ut meliora sint et pulchriora, et sic non erunt ad non esse inclinata. Terra autem est Ecclesia fluens lacte et melle . Sed haec est fundata " super stabilitatem suam, " petram scilicet firmissimam Christum. Matth. VII, 25 : Fundata erat supra petram,. Propter hoc non cadit, sed stat in aeternum. Eccle. I, 4 : Terra autem in aeternum stat. Fundata etiam est super fidem Christi, quae deficere non potest, quidquid agant mali. Matth. XVI, 18 : Et super hanc petram, fidem scilicet quam confitebatur Petrus, aedificabo Ecclesiam meam. In Psal. xlv, 6 : Deus in medio ejus non commovebitur.

" Abyssus sicut vestimentum. " Hic tangitur dispositio aquae.

Quasi diceret : Sic disponis terram, et " abyssus, " mare scilicet, et omnis aquarum congeries, " et amictus ejus sicut vestimentum. " Ad litteram, aquae marinae et flumina operiunt terram. Isidorus dicit quod " Oceanus dicitur ip-" sum mare, eo quod orbem circumdat, " ut possit dicere terra illud Jonae II, 6 : " Abyssus vallavit me. " Sic Ecclesia abysso tribulationum circumdatur et vallatur. II ad Timoth. III, 12 : Omnes qui pie volunt vivere in Christo Jesu,persecutionem patientur. Sed sicut vestimentum quod fovet indutum. In his enim non destruitur, sed magis fovetur, et calor charitatis in ea conservatur. Exod. I, 12 : Filii Israel, quo plus affligebantur, eo plus crescebant, et multiplicabantur .

" Super montes. " Hic secundum, in quo tangitur de dispositione creaturarum inferiorum in ipso diluvio.

Ait enim : Sic aliquando abysso circumdabatur terra, et tantum crevit, quod " aquae abyssi, " supple, stabunt tua dispositione " super montes, " elevatae supra cubitis quindecim, sicut habetur, Genes. VII, 20. Et iterum, V. 19 : Et aquae praevaluerunt nimis super terram, apertique sunt omnes montes excelsi sub universo caelo.

Aqua deliciarum et voluptatum modo operuit montes, Praelatos et magnos homines, ascendens usque ad summum illorum. In Psal. lxviii, 2 : Salvum me fac, Deus, quoniam intraverunt aquae , usque ad animam meam," Ab increpatione.)) Hic tertium, in quo tangitur magnificentia Dei in dispositione creaturarum inferiorum post diluvium : et dicuntur quatuor. Primo, ostenditur Dei magnificentia in diminutione aquarum. Secundo, in apparitione montium, et camporum, ibi, v. 8 : " Ascendunt montes. " Tertio, in relusione aquarum in propriis alveis, ibi, v. 9 : " Terminum posuisti. " Quarto, in recuperatione soliti cursus, et originum suarum, ibi, v. 10 : " Qui emittis fontes. "

In prima duo. Primo, Dei magnificentia in cohibitione fluxus inordinati aquarum. Secundo, in diminutione cohibitaram, ibi, " A voce tonitrui. "