Albert the Great, Commentarii In Psalmos

Dicit ergo : Sic laudate Deum, interius ipsum desiderando, et quaerendo : et ut desiderium inflammetur, " mementote mirabilium ejus quae fecit, " vos in aegypto multiplicando mirabiliter, sicut habetur, Exod. I, 12 et seq. Job, v, 9 : Qui facit magna, et inscrutabilia, et mirabilia, quorum non est numerus.

" Prodigia " etiam mementote, quae fecit ad educendum vos de aegypto, a cap. VII Exodi usque ad cap. XIV. Exod. VII, 3: Multiplicabo signa, et ostenta mea in terra aegypti.

" Et judicia oris ejus, " hoc est, ab ore ejus contra Pharaonem procedentia, quando in mari Rubro submersi sunt . Exod. vii, 4 : Educam exercitum et populum meum filios Israel de terra aegypti per judicia maxima.

" Semen Abraham. " Hic secundum, in quo ostendit quos recolere beneficia

Dei velit, Et primo, quod ab Abraham seminatos. Secundo, quod natos de Jacob, ibi, " Filii Jacob. "

Ait ergo : Sic monui recolere Dei beneficia vos specialiter, qui estis " semen Abraham,)) id est, imitatores Abrahae, " servi ejus, " in fide. Ad Galat. iii, 16 : Abrahae dictae sunt promissiones, et semini ejus in saecula. Vocatur autem Abraham servus competenter, quia ipsi datum est primo praeceptum de circumcisione, quod fuit initium servitutis : servi enim talibus signis solent signari . Item, quia obedivit in filii immolatione, quantum in se fuit . Circumcisi ergo, et obedientes, hi sunt veri filii Abrahae, non carnales Judaei. Ad Roman. IX, 6 et seq. : Non omnes qui Israel sunt, ii sunt Israelitae: neque qui semen sunt Abrahae, omnes filii:... id est, non qui filii carnis, hi sunt filii Dei, sed qui filii sunt promissionis, aestimantur in semine.

" Filii Jacob, " imitatione similiter, " electi ejus, " et hoc in bona operatione luctando contra carnem, mundum, et diabolum. Jacob enim luctator interpretatur : et dicitur electus, quia ab ipso utero, priusquam nati essent, reprobato Esau, a Deo electus est. Malach. I, 2 et 3 : Nonne frater erat Esau Jacob ? dicit Dominus: et dilexi Jacob, Esau autem odio habui. Sic ergo addit optime filiis Abrahae, per quos imbuti in recta fide, filios Jacob, ut sint etiam simul fortes in bona operatione. Parum enim est esse filium Abrahae per fidem, nisi sis Jacob per bonam operationem.. Jacob. II, 20 : Fides sine operibus mortua est.

" Ipse Dominus Deus noster. " Hic secunda pars totius hujus Psalmi. Postquam enim invitavit filios Abrahae et Jacob ad laudem., et beneficiorum Dei memoriam, hic assignat causam laudis, et ipsa beneficia, propter quae laudandus est, specificat. Et secundum sex beneficia illi genti exhibita ad litteram, sunt sex partes. Primum est terrae Chananaeorum promissio. Secundum est contra inimicos fratris protectio, ibi, v. 12 : " Cum essent numero. " Tertium, ipsorum in terra aegypti multiplicatio, ibi, v. 24 : " Et auxit populum. " Quartum est a servitute aegyptiaca liberatio, ibi, v. 28: " Misit Moysen. " Quintum, ipsorum sustentatio in deserto, ibi, v. 39 : " Expandit nubem. " Sextum, ipsorum in terram promissam introductio, ibi, v. 42 : " Quoniam memor. "

In prima quatuor. Primo, dicitur quis promisit. Secundo, quando et quomodo promisit, ibi, v. 8 : " Memor fuit. " Tertio, quibus promisit, ibi, f. 9 : " Quod disposuit. " Quarto, quid, ibi, v. 11 : " Dicens : Tibi dabo. "

In prima duo. Describitur enim promittens a dominio duplici. In Judaeis primo : et in Gentibus secundo.

Ait ergo: Sic laudate, et beneficia ejus recolite, quia ipse " Dominus Deus noster, " non tantum apud nos potest, imo, " in universa terra judicia ejus " currunt. Isa. LIV, 5 : Deus omnis terrae vocabitur. Sed contra, in Psal. cxlvii, 20 : Non fecit taliter omni nationi, et judicia sua non manifestavit eis. Respondeo. Verum est primo et principaliter, sed omnibus manifestavit secundario, ut fieret ex Gentibus et Judaeis unum ovile, et unus pastor in Christo.

" Memor fuit. " Hic secundum, quando et quomodo qui tantus est, promiserit : in quo dicuntur duo. Primo, innuit eum ab antiquo promisisse. Secundo, promissionem divulgasse, ibi, " Verbi quod mandavit. "