Albert the Great, Commentarii In Psalmos

Dicit ergo : Sic adsint faeneratores, adsint diripientes : " et non sit illi adjutor, ad liberandum ab hoc vel ab illo. Isa. x, 3 : Quid facietis in die visitationis, et calamitatis de longe venientis? Ad cujus confugietis auxilium? Deuter. xxviii, 31 : Oves tuae dentur inimicis tuis, et non sit qui te adjuvet.

" Nec sit qui misereatur. " Ecce secundum. Quasi diceret: Non sit adjutor exterius in opere, " nec sit qui misereatur, " interiori comparatione, " pupillis ejus, " quorum aetas et status deberet ad compassionem movere. Isa. IX, 17 : Pupillorum ejus, et viduarum non miserebitur. Et, XIII, 18 : Sagittis parvulos interficient, et lactantibus uteris non miserebuntur. Jacob. II,13 : Judicium sine misericordia fiet illi qui non fecit misericordiam.

" Fiant nati. " Hic quintum malum, quod imprecatur ei in successoribus, scilicet mortis velocitas : et dicuntur duo. Primo, imprecatur filiis mortem. Secundo, mortis velocitatem, et generalitatem simul, ibi, " In generatione una, "

Ait enim : Sic sint pauperes, " et fiant nati ejus in interitum, " ut ipsi intereant propter peccatum patris. Ad Roman. VI, 23 : Stipendia autem peccati mors. Et, Joan. viii, 21 : In peccato vestro moriemini. Et nota quod dicit: " Fiant in interitum: " quasi diceret,semper sint in ipso interitu : unde videtur mortem imprecati aeternam. II ad Thessal. I, 19 : Paenas dabunt in interitu aeternas. Et tunc intelligendum est de filiis imitationis.

" In generatione una. " Ecce secundum. Quasi diceret : Sic intereant, et sic " deleatur nomen ejus in una generatione, " ut velociter ejus posteritas finiatur, et tota annihiletur usque ad nominis amissionem. Eccli. xli, 10 : De patre impio queruntur filii, quoniam propter illum sunt in opprobrio. Isa. XIV, 21 : In iniquitate patrum suorum non consurgent, nec haereditabunt terram. Et, paulo post, v. 22 : Perdam Babylonis nomen, et reliquias, et germen, et progeniem, dicit Dominus.

" In memoriam redeat. " Hic secundum illius partis, in qua Imprecatur Judae malum in suis. Primo enim imprecatus est in successoribus, hic In antecessoribus : illis, quia imitati sunt Judam : istis, quia imitatus est illos. Primi a Juda quasi receperunt : hi in Judam quasi induxerunt. Et primo, precatur Deum jugem habere memoriam de eorum culpa. Secundo, infligere paenam pro illa, ibi, in medio v. 15 : " Et dispereat, "

In prima duo. Primo, precatur Deum habere memoriam. Secundo, memoriae continuitatem, ibi, v. 15 : " Fiant contra Dominum. "

Et in prima primo precatur Deum habere memoriam peculi patris Secundo, matris, ibi, " Et peccatum matris. "

Ait enim : Sic puniatur in suis successoribus : et "iniquitas patrum ejus, " si forte abcesserat, " redeat in memoriam in conspectu Domini, " ut propter ipsam affligat Judam, ipsorum imitatorem in iniquitate. Job, XXI, 19 : Deus servabit filiis illius dolorem patris. Apocal. XVI, 19 : Babylon magna venit in memoriam ante Deum. Osee, IX, 9 : Recordabitur iniquitatis eorum, et visitabit peccata eorum.

" Et peccatum matris ejus non deleatur, " non sit tamquam res deleta, quae non est in memoria, sed sit sicut illae, de quibus Jerem. XVII, 1 : Peccatum Juda scriptum est stylo ferreo in ungue adamantino. Haec mater ejus, puto, est carnalis Jerusalem, de qua Matth. xxiii, 37 : Jerusalem, Jerusalem,quae occidis prophetas, sicut spiritualis et caelestis est mater nostra. Hujus peccatum non est deletum. Thren. I, 14 :

Vigilavit jugum iniquitatum mearum : in manu ejus convolutae sunt. Et, Jerem. xxiii, 40 : Dabo vos in opprobrium sempiternum, ei in ignominiam aeternam, quae numquam oblivione delebitur.

" Fiant contra Dominum. " Hic secundum, in quo precatur memoriae continuationem. Quasi diceret : Sic petii, quod Dominum peccata illorum in memoria habeat, et non ad tempus, imo " fiant " peccata illa, " semper contra Dominum, " id est, ante oculos Domini : unde alia littera habet, " In conspectu Domini, " tamquam signata et fixa. Deuteron. XXXVII, 34 : Nonne haec condita sunt apud me, et signata in thesauris meis ? Jerem. xvii, 10 : Ego Dominus scrutans corda, probans renes. Ad Hebr. IV, 13 : Omnia nuda et aperta, sunt oculis ejus. Vel sic : cc Fiant contra Dominum, " pater et mater, " semper, " ut sint blasphemi, et contradicentes divinae voluntati. Luc. XI, 23 : Qui non est mecum, per fidem, et obedientiam, contra me est. Job, XXXIV, 36, et 37 : Ne desinas ab homine iniquitatis, tamquam oblitus, quin semper eum affligas : quia addit super peccata sua blasphemiam.

" Et dispereat. " Hic secundum, in quo postquam precatus est Deum habere jugem de peccatis eorum memoriam, addit paenam, qua vult eos puniri, ut dispereant usque ad memoriae annihilationem.

Ait enim : Sic veniat iniquitas in memoriam, et semper sit in illa, " ei dispereat de terra, " ad litteram, " memoria eorum, " ut non sint omnino alicujus bonae famae. Job, XVIII, 17 : Memoria illius pereat de terra, et non celebretur nomen ejus in plateis. Eccli. x, 21 : Memoriam superborum perdidit Domi-nus : memoriam dulcem, bene redolentem non relinquunt, sed faetentem memoriam. Proverb. x, 7 : Memoria justi cum laudibus: et nomen impiorum putrescet,

" Pro eo quod non est recordatus, ". Hic secunda pars totius illius in qua petit adversarii paenam. Postquam enim petiit paenam, hic subjungit causam, quare tali paena puniendus, scilicet Judae culpa. Peccavit autem Judas contra Christi humanitatem : et hanc culpam tangit primo. Peccavit et contra divinitatem : et hanc tangit secundo, ibi, v. 20 : " Hoc opus eorum qui detrahunt. "

In prima duo dicuntur. Primo, de persecutione Christi hominis. Secundo, de motiva causa persecutionis, ibi, in medio v. 18: " Et induit maledictionem. "

In prima tanguntur quatuor. Primo, crudelitas persecutionis, tamquam dispositio ad persequendum. Secundo, ipsa persecutio, ibi, v. 17 : " Et persecutus est. " Tertio, persecuti descriptio, ibi, " Hominem inopem. " Quarto, ad quid, ibi, " Mortificare. "