Albert the Great, Commentarii In Psalmos

Dicit ergo : Sic fiat ei ut dixi : et justum est: " pro eo, " id est, quia, " non est recordatus, " propter duritiam cordis, et crudelitatem, " facere misericordiam. " Jerem. VI, 23 : Crudelis est, ei non miserebitur ejus : tamen discipulus erat ejus qui dixerat, Matth. v, 7 : Beati misericordes, quoniam ipsi misericordiam consequentur. Et, IX, 13 : Discite quid est : Misericordiam volo, et non sacrificium. Et audisse poterat illud Eccli. xxviii, 4 : In hominem similem sibi non habet misericordiam, ei pro peccatis suis deprecabitur ? Quasi diceret : Nihil valebit illi, quia Jacob. II, 13 : Judicium sine misericordia fiet illi qui non fecit misericordiam.

" Et persecutus est. " Ecce persecutio ipsa, sed quam statim sequitur persecuti descriptio, quem describit a tribus. A destitutione omnis humani auxilii. A carentia ad sustentationem necessarii, ibi, " Et mendicum. " Ab afflictione cordis interiori, ibi, " Et compunctum. "

Ait enim : " Et persecutus est hominem inopem, " sine spe humani vel mundani auxilii, " et mendicum, " carentem rebus ad sustentationem necessariis. Ipse enim erat, in cujus persona David loquens in Psal. lxxxv, 1, dicebat: Inops, et pauper sum ego. Isa. lxiii, 5 : Circumspexi, et non erat auxiliator. Psal. XXI, 12 : Tribulatio proxima est, et non est qui adjuvet. Thren. iii, 10 : Recordare paupertatis et transgressionis meae.

" Et compunctum, " multis doloribus, " corde, " interius. Alibi, in Psal. lxviii, 30 : Ego sum pauper et dolens. Genes. VI, 6 : Tactus dolore cordis intrinsecus. Hunc persequebantur ministri Pilati et Judaeorum, secundum illud Psal. lxviii, 5 : Confortati sunt qui persecuti sunt me, inimici mei injuste : sed Judas erat principalior. Luc. xxii, 47 : Ecce turba, et qui vocabatur Judas, unus de duodecim, antecedebat eos. Sed ad quid persecutus est ? " Mortificare, " id est, ad mortificandum et occidendum, sicut apparuit ex post facto. Haec ergo persecutio figurata fuit in illa persecutione, qua persecutus est Saul David. I Reg. XXIV, 15: Quem persequeris, rex Israel ? quem persequeris ? canem mortuum, et pulicem unum. Qua persecutus est Cain Abel fratrem suum : qua Absalon patrem proprium .

" Et dilexit maledictionem. " Hic tangitur motiva causa persecutionis, quae est duplex. Prima, adhaesio peccato immoderata, vel commutabili bono. Secunda, abjectio et contemptus immutabilis boni, ibi, " Et noluit benedictionem,. "

In qualibet tanguntur duo. Primo, culpa. Secundo, adhaerens necessario paena.

Ait enim : Sic persecutus est, sed quomodo factum est hoc? quis ipsum movit ? Et respondet : " Dilexit maledictionem, " res temporales, quae dicuntur maledictio occasionaliter. Eccli. III, 27 : Qui amat periculum, in illo peribit. I ad Timoth. VI, 9 : Qui volunt divites fieri, incidunt in tentationem, et in laqueum diaboli, " Et veniet ei, " supple, maledictio. Habac. ii, 9: Vae qui congregat avaritiam malam domui suae ! Appellat forte maledictionem ipsam malitiam quae ei placebat. Psal. li, 5 : Dilexisti malitiam super benignitatem. Deuter. XI, 26: En propono in conspectu vestro hodie benedictionem et maledictionem. Eccli. xv, 17 : Apposuit tibi Dominus aquam et ignem, peccatum scilicet, et bonum : ad quod volueris, porrige manum tuam. Sic et Judaei maledictionem dilexerunt, et venit super eos, quando dixerunt, Matth. XXVII, 25 : Sanguis ejus super nos, et super filios nostros. Et venit super illos illud Osee, XII, 14 : Sanguis ejus super eum veniet, et opprobrium ejus restituet ei Dominus suus.

" Et noluit benedictionem, " benedictum scilicet Christi consortium,nec conjunctionem sui cum Deo : " et elongabitur ab eo, " multum: quia descendit in infernum, ille ascendit in caelum. Psal. lxxii, 27 : Qui elongant se a te, peribunt. I Paral. XXVIII, 9 : Si dereliqueris eum, projiciet te usque in aeternum. Et Judaei ad litteram hanc benedictionem noluerunt, quando dixerunt caeco illuminato, Joan. IX, 28 : Tu discipulus illius sis : et ab eis est elongatus transiens ad Gentes. Psal. CXVIII, 155 : Longe a peccatoribus salus. Job, v, 4 : Longe fient filii ejus a salute. Act. xxii, 21 : In nationes longe mittam te, quia, Eccli. xv,7, dicitur : Longe abest Dominus a superbia et dolo.

" Et induit maledictionem. " Hic tertium, in quo agitur de modo persequendi. Et primo, quia persecutus est exteriori opere. Secundo, quia interiori voluntate, ibi, " Et intravit, " Tertio, quod fraudulenter in utroque, vel aperte secundum diversos modo legendi, ibi, v. 19 : " Fiat et. " Quarto, quod constanter, ibi, " Et sicut zona. "