Albert the Great, Commentarii In Psalmos

Dicit ergo : Sic in me sum afflictus, " et, " in membris meis, " excussus sum sicut locustae, " quae simul non manent, sed de loco ad locum salientes disperguntur. Joan. XVI, 32, dicit Jesus illis paucis quos habebat : Ecce venit hora, et jam venit, ut dispergamini, terrore persequentium, unusquisque in propria, et me solum relinquatis. Matth. XXVI, 31 : Percutiam pastorem, et dispergentur oves gregis .Et, paulo post, v. 56 : Tunc discipuli omnes, relicto eo, fugerunt. Et optime dicit, Excussus : sicut farina in cribro excutitur, sic Apostoli fuerant fortiter excussi. Luc. XXII, 31 : Simon, Simon, ecce Satanas expetivit vos,ut cribraret sicut triticum. Sed his excussis, successerant postea filii optimi,et non excussi, sed adversarios fortiter sauciantes. Psal. CXXVI, 4 : Sicut sagittae in manupotentis, quae vulnerant fortiter, ita filii excussorum. Hoc autem tempore Martyrum, et Confessorum : nunc autem excutiuntur a diabolo valde de facili, qui in alto positi sunt. Apocal. VI, 13 : Stellae de caelo ceciderunt super terram, sicut ficus emittit grossos suos cum a vento magno movetur.

" Genua mea. " Ecce secundum. Quasi diceret : Sic a me excussi sunt, in quo tamquam in quadam arbore quiescebant, et " genua mea, " ipsimet tamquam genua me sustentabant, " infirmata sunt, " timore mortis et miseriae. Ezech. XXI, 7 : Per cuncta genua fluent aquae. Tamen postea fuerunt, sicut dicetur, confirmata. Job, IV, 4 : Genua trementia confortasti. Et hoc, " a jejunio, " id est,propter jejunium, propter mei carentiam, qui eos tamquam vivus panis reiiciebam . Luc. v, 35 : Venient dies, cum ablatus fuerit ab illis sponsus, tunc jejunabunt in illis diebus .

" Et caro mea. " Hic secundum, scilicet illorum aliqua consolatio ex Christi resurrectione.

Ait enim : Sic infirmati sunt a jejunio, " et " post, ne infirmitas illa ad mortem esset, " caro mea immutata est, " in melius scilicet mutata, secundum illud Apostoli, I ad Corinth. xv, 51 : Omnes quidem resurgemus, sed non omnes immutabimur. Et, Job, XIV, 14 : Exspecto donec veniat immutatio mea. Et hoc, " propter oleum, " id est, propter gratiam tuam, non meis meritis, quae oleum dicitur. Isa. x, 27 : Computrescet jugum a facie olei, id est, gratiae Dei. Tanta enim fuit in Christo gratiae plenitudo virtute unionis, ut non potuerit detineri morte, sed statim cum voluit, resurrexit. Act. x, 38 : Unxit eum Deus Spiritu sancto, et virtute, Psal. xliv, 8 :

Unxit te Deus, Deus tuus, oleo laetitiae, etc.

" Et ego factus sum. " Hic de injuria in verbo, postquam actum est de injuria in facto.

Ait enim : Sic persecuti sunt me, et in me,et in meis : " et, " etiam " ego factus sum opprobrium illisa ab eis multa vituperia sustinendo. Thren. III, 14 : Factus sum in derisum omni populo, canticum eorum tota die. Et in eodem, v. 30 : Saturabitur opprobriis. Christus enim non ambitione, et pompa per mundum incedebat, sed in simplicitate, et propter hoc irridebatur. Job, XII, 4 : Deridetur justi simplicitas. Et illis derisionibus nostras sustulit derisiones, illis maledictionibus nostras maledictiones. Ad Galat. III, 13 : Christus nos redemit de maledicto legis, factus pro nobis maledictum.

" Viderunt me. " Hic subjungitur de injuria in signo.

Quasi diceret : Sic factis hijuriati sunt, et verbis irriserunt : et etiam " viderunt me " in cruce pendentem, " et moverunt capita sua, " irridendo me tali signo. Isa. lxii, 2 : Vidimus eum, et non erat adspectus : quasi nihil erat ad adspiciendum. Deuteron. XXVIII, 66 : Erit vita tua quasi pendens, id est, vere pendens, ante te. Videbant ergo, et caput movebant. Matth. xxvii, 39 : Praetereuntes autem blasphemabant eum moventes capita sua. Eccli. xii, 19 : Caput suum movebit, et plaudet manibus.

" Adjuva me, Domine. " Hic secundum, in quo postquam petiit liberari a malo, petit promoveri in bono. Duo ergo dicuntur in hac parte. Primo, petit gloriosam resurrectionem. Secundo, ut magis moveat, ostendit effectus conse- quentes ad illam, ibi, v. 27 : " Et sciant quia maniis. "

In prima tria. Primo, petit auxilium homo Christus a Deo Patre. Secundo, subjungit in quo velit adjuvari, ibi, " Salvum me fac. " Tertio, per quid, per misericordiam, non per justitiam, ibi, " Secundum misericordiam. "

Ait enim : Sic factus sum illis opprobrium in verbo, illusus in facto : sed o " Domine Deus meus, " rogo, " adjuva me. " In quo ? " Salvum me fac " a morte, imo a mortalitate, et me in meipso, et me in membris meis. Et hoc non meis meritis, sed " secundum misericordiam tuam. " II Paral. in oratione Manassae, sub finem : Salvabis me indignum secandum magnam misericordiam tuam. Pro sua salute oravit, cum, Luc. XXIII, 46, dixit : Pater, in marius tuas commendo spiritum meum. Pro suis, Joan. XVII, 11 : Pater, serva eos in nomine tuo, ut sint unum, sicut et nos unum sumus. Ad Tit. III, 5 : Non ex operibus justitiae, quae fecimus nos, sed secundum suam misericordiam salvos nos fecit.

" Et sciant quia manus. " Hic tangit effectus consequentes ad salvationem. Et primo, consequentes in. omnibus tam bonis quam malis indifferenter. Secundo, consequentes in malis specialiter, et in bonis, ibi, v. 28 : " Maledicent illi. "

In prima duo secundum duplicem conditionem in omnibus consequentem indifferenter. Primo, quod sciant Christum Dei Filium. Secundo,quod incarnatum, ibi, " Et tu, Domine, fecisti eam. "

Ait enim : Sic adjuva, et salva : " et sciant " per hoc, " quia manus tua haec, " supple, est, quae in oculis eorum est, nec ipsam cognoscunt, id est sciant me esse manum tuam, illam, de qua scriptum est : Manus tua Gentes disperdidit, et plantasti eos . Et quam petie- runt dicentes illud cum desiderio et fervore : Emitte manum tuam de alto . Et, Isa. XXVI, 11 : Domine, exaltetur manus tua, Filius tuus scilicet in cruce elevetur. Sciant, inquam, boni ad gloriam, mali autem ad paenam : illi experiendo bonitatem et dulcedinem, isti sentiendo justitiam. Joan. viii, 28 : Cum exaltaveritis filium hominis, tunc cognoscetis, quia ego sum, ''etc.

" Et tu, Domine. " Ecce secundum. Quasi diceret : Sciant me manum esse, et sciant, quia " tu, Domine, fecisti eam, " manum scilicet : fecisti, inquam, carnem secundum illud Joan. I, 14 : Verbum caro factum est. Isa. xliv, 2 : Haec dicit Dominus faciens et reformans te, ab utero auxiliator tuus. Nemo enim posset illam generationem tam mirabilem fecisse, nisi tu, imo nec excogitasse, nec posset adhuc explicare. Isa. liii, 8 : Generationem ejus quis enarrabit ? Propter hoc petebat Ecclesiasticus, Eccli. XXXVI, 7 : Glorifica manum, et brachium dextrum.

" Maledicent illi. " Hic tangit speciales in malis : et hoc primo. Secundo in bonis, ibi, v. 30 : " Confitebor Domino. " in prima dicuntur duo, secundum duplex malum quod sequitur in malis. Primo, malum culpae. Secundo, paenae, ibi, " Qui insurgunt. "

Maledictio qua maledicent Christo inaniter : unde tangitur eorum miseria : et postea agitur de Christi gloria, ibi, " Et tu benedices. "

Ait ergo : Sic omnes scient, et " illi maledicent, " scilicet perversi, et in malitia obstinati, et mihi in me, et in membris meis, deteriores Balaam, qui timebat maledicere populo Dei, Numer. xxiii, 8 : Quomodo maledicam cui non maledixit Dominus ?

" Et tu benedices, " eorum maledictionem in benedictionem convertendo, sicut de maledictione Balaam factum fuit, Numer. XXIII, 5 : Vertit Dominus maledictionem ejus in benedictionem tuam. Quomodo autem hoc fiat, dicitur, Matth. v, 11 : Beati eritis cum maledixerint vobis,homines scilicet,ei exprobraverint, etc.

" Qui insurgunt in me, " vel nunc ante Resurrectionem, vel post, " confundantur, " illa confusione, de qua, Eccli. IV, 25 : Est confusio adducens peccatum, impatientiae scilicet et blasphemiae. Jerem. XVII, 18 : Confundantur qui me persequuntur, et non confundar ego. Et, in Psal. lii, 6 : Confusi sunt, quoniam Deus sprevit eos.

" Servus autem tuus, " ego scilicet, per oppositum " laetabitur, " vel in seipso, vel in membris suis. In se, propter victoriam de inimicis. Supra, in Psal. CIII, 31 : Laetabitur Dominus in operibus suis. Et vocat se servum Christus propter perfectam obedientiam, quae fuit in ipso, Ad Philip. II, 8 : Factus est obediens usque ad mortem. Propter veram humilitatem, Matth. XI, 29 : Discite a me, quia mitis sum et humilis corde. Propter ministrationem : haec est enim servorum. Matth. xx, 28 : Filius hominis non venit ministrari, sed ministrare. Laetabitur etiam in membris suis, secundum illud Isa. lxv, 14 : Servi mei laetabuntur, et vos confundemini.

" Induantur qui detrahunt. " Hic subjungitur de modo confusionis. Et primo, quod evidenter. Secundo, quod totaliter, intus scilicet, et extra, ibi, " Et operiantur. "