Albert the Great, Commentarii In Psalmos

Dicit ergo : Sic dii gentium vani sunt, et inutiles omnino, quia " os habent, " secundum apparentiam, quia animalia rationalia vocem formare potentia, " et " tamen " non loquentur, " tamquam omnino usu oris carentia. Baruch, VI, 7 : Lingua ipsorum polita a fabro : ipsa etiam inaurata ei inargentata, falsa sunt, ei non possunt loqui.

" Oculos habent, " illa simulacra secundum apparentiam, " et non videbunt, " ut usum oculorum exerceant : quippe sine anima sunt. Sapient. xv, 4 et 5 : Effigies sculpta per varios colores, cujus adspectus insensato dat concupiscentiam, et diligit mortuae imaginis effigiem sine anima. Iterum : Si animam haberent, oculos tamen plenos habent pulvere, ut videre non possint. Baruch, VI,16 : Oculi eorum pleni sunt pulvere a pedibus introeuntium.

" Aures habent, et non audient. " Hic ostendit usus auditus defectum. " Nares habent, et non odorabunt: " hic olfactus. " Manus habent, et non palpabunt : " hic tactus. Sed quare non facit mentionem de gustu ? Responsio. Posset esse, quod gustus quidam tactus est, et sub ipso comprehenditur. Iterum : Illa tantum tangit, per quae idola ad alios, scili- cet idololatras, videbantur ordinata : gustus autem ad seipsum, et ad sustentationem ipsius substantiae, et propter hoc non commemoratur.

" Pedes habent, et non ambulabunt. " Ecce defectum motus. Sapient. xv, 15 : Omnia idola nationum deos aestimaverunt, quibus nec oculorum usus est ad videndum, neque nares ad percipiendum spiritum, neque aures ad audiendum, neque digiti manuum ad tractandum, sed et pedes eorum pigri ad ambulandum. Sapient. XIII, 19 ; Pro itinere petit ab eo qui ambulare non potest.

" Non clamabunt. " Hic ostendit, quod carent usu sensus animalium imperfectorum : omnia enim animalia vocem emittere possunt a gutture : quod non possunt etiam simulacra. Baruch, VI, 65 : Neque regibus maledicent, neque benedicent. Et arguit in eodem miram idololatrarum stultitiam. Ait enim, ibidem, v. 40 : Qui cum audierint mutum non posse loqui, offerunt illud ad Bel, postulantes ab eo loqui.

In his arguuntur Praelati inscii, et perversi, qui idola sunt et simulacra. Zach. XI, 17 : 0 pastor, et idolum derelinquens gregem. Primo, de mala adeptione praelationis, quia indigni sunt. Sunt enim aurum et argentum cupiditate et amore. Augustinus : " Si paleam se-" queris, palea efficeris : ergo si aurum " et argentum sequeris, aurum et argen-" tum efficeris, " Et talis non debet exaltari, sed corruere. Proverb. XI, 28 : Qui confidit in divitiis suis, corruet. Iterum, quia male introducti, non a Deo, sed ab advocatis, a carnalibus amicis, versutiis, et subtilitatibus quibusdam, quasi fabricati. Osee, VIII, 4 : Ipsi regnaverunt, et non ex me : principes exstiterunt, et non cognovi.

Secundo, de negligenti conversatione, et insufficienti. Primo, quia non docent. Os habent, et non loquentur. Jerem. x, 5 : In similitudinem palmae fabricata sunt, et non loquentur. Secundo, quia ignorant. Oculos habent, interiores, ei non videbunt, intelligentes veritatem. Isa. XXVIII, 7 : Sacerdos et propheta nescierunt. Et, lvi, 11 : Ipsi pastores ignoraverunt intelligentiam. Tertio, quai doceri non sustinent ab aliis. Aures, inquit, habent, ei non audient. Dicitur tamen illis, Sapient. VI, 2 : Audite ergo, reges, et intelligite : discite, judices finium terrae. Apocal. II, 7 : Qui habet aures audiendi, audiat quid spiritus dicat Ecclesiis, per Scripturas sacras. Quarto, quia non discernunt et judicant quid sit bonum, et quid malum, qui sint boni et qui mali. Nares habent, et non odorabunt, bonum a malo discernendo, sed totum confundunt. Isa. III, 24 : Erit pro suavi odore faetor. Quinto, quia per opus bonum non illuminant alios. Alanus habent, et non palpabunt. Proverb. XXI, 25 : Noluerunt (quidquam manus ejus operari. Et si aliquando os habeant, et loquantur, frequentius tamen carent usu manuum. Genes. xxvii, 22 : Vox quidem, vox Jacob est: sed manus, manus sunt Esau. Sexto, quia desideriis bonis ad aeterna non currunt. Sapient. xv, 15 : Pedes eorum pigri ad ambulandum. Nec mirum, quia spinas multas habent in pedibus, id est, divitias. Spinae divitiae a Domino appellantur . Septimo, quia non gemunt pro propriis et alienis peccatis, quod est clamare in gutture, quod suum esset tamen. Job, XXVI, 5 : Ecce gigantes gemunt sub aquis. Sed magis eructant sonantes in gutture propter crapulam. Psal. v, 11 : Sepulcrum patens est guttur eorum, ad recipiendum carnes diversorum animalium mortuorum. Osee, VIII, 1 : In gutture tuo sit tuba quasi aquila super domum Domini, ''supple, existens.

" Similes illis fiant. " Hic secundum,

in quo imprecatur cultoribus, et factoribus idolorum. Et primo, factoribus. Secundo, cultoribus, ibi, " Ei omnes. "