Albert the Great, Commentarii In Psalmos

Dicit ergo : Sic Implebitur tandem, et recordante Domino, universalis conversio : sed, o " Domine, " pro hac conversione " non laudabunt te mortui, " In Psal. lxxxvii, 12, supra : Numquid narrabit aliquis in sepulcro misericordiam tuam, ipsam laudando, et tibi confitendo ? Eccli, xvii, 26 : A mortuo quasi nihili perit confessio. Mortuus autem est, qui est in peccato, dum tamen vult manere in illo : et hic laudare non potest, quia Eccli. xv, 9, dicitur : Non est speciosa laus in ore peccatoris. Propter hoc dicitur in Psal. xxxiii, 22 : Mors peccatorum pessima, tota - In miseria, non in laude. Mala in rerum temporalium amissione, quas dilexit : pejor in animae a corpore separatione : sed pessima in utriusque perditione in infernum, et contritione ab Igne et verme. Isa. lxvi, 24 : Vermis eorum non morietur, et ignis eorum non exstinguetur.

Sed sunt mortui qui possunt laudare. Primi, mortui peccato, de quibus Apostolus, ad Roman. VI, 11 : Existimate vos mortuos quidem peccato. Et mortui mundo, de quibus idem, ad Coloss. III, 3 : Mortui quidem estis mun-do, ei vita vestra abscondita est, etc. Mortui cum Domino in tribulationibus et miseriis, Ad Ronan. VI, 8 : Si mortui sumus cum Christo, credimus quia simul etiam vivemus cum Christo. Mortui ad litteram pro Domino, sicut Martyres sancti, Psal. cxv, 15 : Pretiosa est in conspectu Domini mors sanctorum ejus. Ad Roman. VIII, 36 : Propter te mortificamur tota die, aestimati sumus sicut oves occisionis. Mortui In Domino, In fide scilicet Domini, Apocal. XIV, 12 : Beati mortui, qui in Domino moriuntur. Act. vii, 59 : Obdormivit in Domino,

" Neque omnes, " Ecce secundum. Quasi, diceret : Sic mortui non laudabunt, " neque omnes qui descendunt in infernum, " laudare poterunt. Isa. xxxviii, 18 : Non infernus confitebitur tibi, neque mors laudabit te. I Reg. ii, 9 : Impii in tenebris conticescent. Hic ergo confitere et lauda, quia, Eccle. IX, 10 : Quodcumque facere potest manus tua, instanter operare : quia nec opus, nec ratio, nec sapientia, nec scientia erunt apud inferos, quo tu properas,

" Sed nos qui vivimus. " Hic secundum, in quo ostenditur qui possunt laudare, et modus quo laudabunt : et secundum hoc duo dicuntur. Primo, conditionem tangit laudantium. Secundo, laudis modum, quoniam aeternaliter, ibi, " Ex hoc nunc. "

Ait enim : Sic nec mortui, nec damnati, poterunt confiteri confessione laudis, " sed nos qui vivimus , " ejus benedictione, " benedicimus Domino, " confessione laudis, cantantes Illud Psal. cxlv, 2 : Laudabo Dominum in vita mea. Eccli. xvii, 27 : Vivens et sanus confiteberis, Domino scilicet. Isa. xxxviii, 19 : Vivens, vivens ipse confitebitur tibi : vivens vita naturae, et vivens vita gratiae. Sed quomodo ? aeternaliter.

cc Ex hoc nunc, " in quo laudamus in praesenti, " et usque in saeculum " futurum. Isa. xxxviii, 20 : Psalmos nostros cantabimus cunctis diebus vitae nostrae in domo Domini : et in praesenti Ecclesia, et etiam in caelesti. Tob. xiii, 10 : Benedicite Domino, omnes electi ejus : agite dies laetitiae, et confitemini illi. Et, XIV, 11 : Mandate filiis vestris, ut sintmemores Dei, et benedicant eum in omni tempore. Hic semiplene benedicunt Deum justi, sed ibi totaliter, et plene. Isa. LI, 11 : Venient in Sion laudantes, et laetitia sempiterna super capita eorum : ut toti superfundantur laetitia sempiterna, ad quam nos perducat, qui est benedictus per omnia saecula saeculorum. Amen.