Albert the Great, Commentarii In Psalmos

Dicit ergo : Sic per lapidem angula- rem, Christum scilicet, facta est mea salvatio, et " istud factum est, " non ab homine, sed " a Domino " ipso. Vel, " istud, " ipse scilicet lapis angularis, " a Domino factum est, " secundum quod homo. Ad Galat. IV, 4: Misit Deas Filium suum factum ex muliere, factum sub lege.

" Et est mirabile in oculis nostris, " et tantae multitudinis gentium conversio, et ipsius Dei incarnatio. De primo, Isa. xlix, 20 et 21 : Adhuc dicent in auribus tuis filii sterilitatis tuae : Angustus est mihi locus, fac spatium mihi ut habitem. Et dices in corde tuo : Quis genuit mihi istos ? ego sterilis, et non pariens. De secundo, Jerem. XXXI, 22 : Creavit Dominus novum super terram : Foemina circumdabit virum, Et, Isa, lxvi, 7 et 8 : Antequam parturiret, peperit... Quis audivit umquam tale ? et quis vidit huic simile? Habac. iii, 2, secundum aliam litteram : " Consideravi opera tua, et expavi : " Et bene in oculis nostris dicit, quia in aperto facta sunt omnia. Isa. LII, 10 : Paravit brachium suum in oculis omnium Gentium,. Et, in Psal. XCVII, 3 : Viderunt omnes fines terrae, salutare Dei nostri. Baruch, III, 38 : In terris visus est, et cum hominibus conversatus est.

" Haec est dies quam fecit Dominus. " Hic secundum, in quo postquam petiit, et petitionem suam exauditam ostendit, consequenter prorumpit in vocem laudis et exsultationis : et profert duo prae gaudio vehementi. Primo, temporis quo haec facta sunt, commendationem. Secundo, aliorum invitationem ad laetitiam et exsultationem, ibi, " Exsultemus et laetemur. "

Ait ergo : Sic Dominus mihi portas justitiae aperuit per lapidem angularem. Ergo, " haec est dies quam fecit Domi-nus : " In qua scilicet haec facta sunt, dies salutis et gratiae, I Reg. XI, 13 : Hodie fecit Dominus salutem in Israel. II ad Corinth. VI, 2 : Ecce nunc tempus acceptabile, ecce nunc dies salutis. Dies refrigerii, Zachar. XIV, 8 : Et erit in die illa : Exibant aquae vivae de Jerusalem, aquae scilicet gratiarum, ardorem concupiscentiae refrigerantes. Dies suavitatis et dulcedinis, Joel, iii, 18 : Et erit in die illa: stillabunt montes dulcedinem, et colles fluent lac et mel.

Notandum enim, quod est dies mala, in qua homo nascitur ad peccatum, quam facit diabolus. Job. iii, 3 : Pereat dies in qua natus sum. Et, Jerem. xx, 14 : Maledicta dies in qua natus sum. Et dies temporalis prosperitatis, quae multis est causa perditionis. Jerem. XVII, 16 : Diem hominis non desideravi, tu scis. Sed est dies naturae quae bona est, de qua, Genes. I, 5 : Appellavitque lucem Diem, et tenebras Noctem. Et est dies gratiae, quae est melior. Joan. viii, 56 : Abraham, pater vester, exsultavit ut videret diem meum. Et est dies gloriae, de qua in Psal. lxxxiii, 11 : Melior est dies una in atriis tuis, etc. Eccli. xxxiii, 7 : Quare dies diem superat ? dies gratiae diem naturae, et dies gloriae diem gratiae ? a sole, lucem suam influente, sicut vult, de quo, Malach. IV, 2 : Orietur vobis timentibus nomen meum Sol justitiae. Osee, VI, 3, de tribus : Vivificabit nos post duos dies: in die tertia suscitabit nos. De media intelligitur quod hic dicitur, et de tertia, quae nobis in die sancto Paschae illucescere coepit, potest intelligi, quae nobis reducitur tota illa septimana ad memoriam et ad imitationem, ut quemadmodum Christus resurrexit, et nos resurgamus. Ad Romam VI, 4 : Ut quomodo Christus surrexit a mortuis, ita et nos in novitate vitae ambulemus. Ad Coloss. III, 1 : Si consurrexistis cum Christo , quae sursum sunt quaerite, ad gratiarum actionem de tanto beneficio. Ad Philip. IV, 6 : In omni oratione et obsecratione cum gratiarumactione preces vestrae innotescant apud Deum.

" Exsultemus. " Ecce secundum. Quia tanta est dies, ergo " exsultemus, " extra, " et laetemur, " intra, " in ea, " Sophon. III, 14 : Laetare, et exsulta in omni corde, filia Jerusalem. Isa. lxv, 18 : Gaudebitis et exsultabitis usque in sempiternum, in his quae ego creo. Exsultemus ergo et laetemur, quia illuminati, qui prius eramus caeci, Isa. IX, 2 : Habitantibus in regione umbrae mortis, lux orta est eis. Quia liberati, qui eramus servi, Joan. viii, 36 : Si Filius vos liberavit, vere liberi eritis. Quia redempti, qui eramus captivi, I Petr. I, 18 et 19 : Redempti estis de vana vestra conversatione,... pretioso sanguine quasi agni immaculati Christi, et incontaminati.

" 0 Domine, salvum me fac. " Hic secundum totius hujus secundae partis Psalmi, in quo postquam petiit ingressum, et unionem in fide cum primitivis de Ecclesia, et obtinuit, adjungit et petit finalem in his bonis perseverantiam, ut in ipsa etiam tribulatione, non cesset a laude : et dicuntur tria. Primo, petit ut detur ei salus et confirmatio in tribulatione. Secundo, asserit se exauditum, ibi, v. 26 : " Benedictus qui venit. " Tertio, laudes solvit pro impetratione petiti, ibi, in medio v. 27 : " Constituite diem. "

In prima duo. Primo, petit salvari a malo. Secundo, prosperari in bono, ibi, " 0 Domine, bene prosperare. "