Albert the Great, Commentarii In Psalmos

Dicit ergo : Sic, Domine, legem tuam impugnant, et dissipant, sed non omnino desperandum, ut totum propter hoc abjicias, nam " mirabilia " sunt " testimonia tua, " antiquis patribus mirabiliter, et tam misericorditer facta, de quibus, Job, v, 9 : Qui facit magna et inscrutabilia et mirabilia absque numero. Item, creaturae omnes, quae attestantur tuae potentiae, et tuae sapientiae, et tuae bonitati, de quibus, Joan. v, 36 : Ipsa opera quae ego facio, testimonium perhibent de me. Item, praecepta, quae vere attestantur bonitati, de quibus, Job, xxxvii, 14 : Sta, cessando a peccato, et considera mirabilia Dei, praecepta. Omnia autem haec sunt nobis mirabilia, Domine, non tibi. Eccli. XXXIX, 25 : Nihil est mirabile in conspectu ejus.

" Ideo. " Hic secundum. Quasi diceret : Sic sunt mirabilia, et antiquis Patribus facta, et opera, et praecepta, et quia mirabilia, inquisitione indigent, et " ideo scrutata estjia anima mea, " non divinitatis secreta, quia, Proverb. xxv, 27 , dicitur : Scrutator majestatis opprimetur a gloria. Sed Scripturae continentes et mirabilia Patribus facta, et tua praecepta, hae scrutandae. Et creaturae diligenter inspiciendae, quia per eas ad cognitionem divinitatis venitur. Sapient. xiii, 5 : A magnitudine speciei et creaturae cognoscibiliter poterit creator horum videri. Ad Roman. I, 20 : Invisibilia ipsius, scilicet Dei, a creatura mundi, per ea quae facta sunt, intellecta,conspiciuntur : sempiterna quoque ejus virtus, et divinitas. Quod autem dicit anima, notat diligentiam in scrutando.

" Declaratio sermonum. " Hic tertium, in quo subjungit suae inquisitionis fructum. Primo, quantum ad se singulariter. Secundo, quantum ad alios qui praeparati sunt generaliter, ibi, " Et intellectum. "

Ait enim : Sic anima mea scrutata est, hoc inveniens, quod " declaratio, " manifesta scilicet, " sermonum, " ante inquisitionem occultorum, " illuminat " ipsam : quippe, Proverb. VI, 23 : Mandatum lucerna est, et lex lux. Et supra, in eodem Psalmo cxviii, 105 : Lucerna pedibus meis verbum tuum, et lumen, etc. Declarantur autem occulta Scripturarum : primo, per inquisitionem diligentem : postea, per publicationem, et per adimpletionem sicut in figuratis : tertio, per promissorumsolutionem, in promissionibus, et commonittonibus.

" Et intellectum. " Ecce secundum. Quasi diceret : Sic illuminat animam meam scrutantem, et etiam " dat parvulis, " humilibus scilicet, qui malitia parvuli sunt, secundum illud Apostoli, I ad Corinth. XIV, 20 : Nolite pueri effici sensibus, sed malitia parvuli estote. " Intellectum. " Matth. XI, 25 : Confiteor tibi, Pater,... quia abscondisti haec a sapientibus et prudentibus, et revelasti ea parvulis. Marc. x, 14 : Sinite parvulos venire ad me. Proverb. viii, 5 : Intelligite, parvuli, astutiam, et, insipientes, animadvertit." Os meum aperui. " Hic secundum, in quo postquam confessus est se inquisivisse diligenter, confitetur se orasse ferventer : et dicuntur quinque. Primo, orationis fervor. Secundo, utilitas inde

consecuta, ibi, " Et attraxi spiritum. " Tertio, fervoris causa, ibi, " Quia mandata. " Quarto, materia, scilicet quid oravit tam ferventer, ibi, v. 132 : " Adspice in me. " Quinto et ultimo, ostendit in oratione sua devotionis et ardoris vehementiam, ibi, v. 136 : " Exitus aquarum. "