1. De sancto Affrodisio.

In 1. Vesperis.

Ad Magnificat.

A. Hierusalem

supernae condo,

Jucundare

jugi laetitia

Christum laudans

in Affrodisio,

Quem divina

subvectum gratia

Coronavit

aeterna gloria;

Hic sanctorum

junctus collegio,

Incessanti

psallens tripudio,

Salutare

canit Alleluja.

Ad Matutinum.

Invitatorium.

Alleluja,

Christum, quem parvulum

Adoravit

dux Affrodisius,

Venite adoremus.

Ad Nocturnum.

Antiphonae.

1. Dux fuit Aegypti,

proprium deseruit omne

Et sequitur Christum

sacra de virgine natum.

2. Discipulus demum

Petri sapiensque magister

Imperiisque suis

hos monuit populos.

3. Martyrii palma

tandem subvectus ad astra

Regnat cum Christo

perpetuo solio.

Responsorium.

4. Fulget his terris

pastor martyrque Biterris,

Quotidie cujus

laus plebis in ore sit hujus,

V. Ut plebs proficiat

et salva sua prece fiat.

Prosula.

1. Hic Affrodisius

Aegypti fuit dux,

2a. Hic Christum puerum

fanis caesis adoravit.

2b. Fugientem eum

septennio reservavit,

3a. Quem quaerebat

Herodes perdere,

3b. Et hic eum

voluit colere.

4. Ergo canamus

Te Deum laudamus.

In Laudibus.

Antiphonae.

1. Dux Affrodisius

cecidisse sciens simulacra

Ingrediente Jesu

suscepit dogmata sacra.

2. Sermo docet scriptus,

quod ei servivit Aegyptus,

Pro Christo, quidquid

possedit, sponte reliquit.

3. Praesul devotus,

plenus dulcedine lotus,

Ignotis notus

a nostra gente remotus.

4. Petri praecepto

jucunda mente percepto

Abluit illotos

sacro baptismate Gothos.

5. Truncato capite

mortem patiens sine lite

Thesaurum pulchrum

capitis tulit usque sepul-

chrum.

Ad Benedictus.

A. Athleta Dei Affrodisius,

Apostolorum fonte

largifluo potatus,

post perpessa Aegypti

gentium ludibria

Petro jubente

Dominoque ducente

Septimaniam

adiit provinciam,

in qua Biterrum postea

pontificali meruit

decorari infula.

In 2. Vesperis.

Ad Magnificat.

A. Videns sanctus

vir Affrodisius

Urbis suae

fana corruere,

Novit vere,

quod Dei filius,

Ortus saecli

vergente vespere,

Mundi sordes

venit abluere ;

Quem dux sacer

complexans artius,

Jam per fidem

sanctis consocius,

Non expavit

mundum relinquere.