III. Benedictio instituti minoritici zelatorum.

Cum sanctorum fratrum per orbem dispersorum odorifera lama multos audiret ad viam veritatis induci, exultabat in spiritu et benedictionibus omni acceptatione dignissimis illos accumulans dicebat: " Benedicti vos a Domino, qui errantes peccatores ad Dominum reducitis, viam veritatis illis ostenditis et vos in sancta evangelii observatione puros et sinceros custoditis. Qui vobis benedicit, a Domino benedicatur, qui vos fovet aut suscipit, mercedem recipiat sempiternam. Nullam in vobis potestatem Satan exerceat, supra id, quod potestis, non tentet. Vobis super illum et suos sit imperandi facultas, portas illius possidete et spolia diripite. Patris vos adjuvet potentia, Filii vos dirigat sapientia, et Spiritus sancti vos foveat clementia, amen. " Iis vero, qui per proprietatem, pecuniae receptionem vel aliud quodcunque peccatum regulae puritatem deturpabant aut ordinem, quem praecipue paupertatis professio decorat, terrenarum rerum pulvere maculabant aut alios suis malis exemplis scandalizabant et ordinem relaxabant, maledictionem Dei et suam terribiliter imprecans dicebat:,, A te, sanctissime pater, et a tota coelesti curia et a me pauperculo sint maledicti, qui suo malo exemplo confundunt et destruunt, quod per sanctos fratres hujus ordinis aedificasti et aedificare non cessas. " Bon. c. VIII. n. 2.