13. In Epiphania DN.

Ad Nocturnum.

1. Nato Mariae filio
Apparet stella populo,
Quae dicit Christum Dominum
Regnare in perpetuum.

2. Quam magi dum adspiciunt
Natumque regem sapiunt,
Jerosolymam properant
Et tunc Herodi nuntiant.

3. Turbatus erat perfidus
Herodes impiissimus,
Timens, ne regnum perderet,
Quod puer natus tolleret.

4. Confestim dicit regibus
Ab orientis partibus:
Ite, videte puerum
Et nuntiate postmodum.

5. Ut ego, quando venero
Dictumque regem videro,
Adorem tunc infantulum,
Quem dicit stella genitum.

6. Per stellam magi ambulant,
Dum Bethlehem pervenerant
Intrantes domum pueri
Adorant regem saeculi.

7. Mystica portant munera
Mox Christo placabilia,
Thure signantes Dominum
Et sacerdotem maximum.

8. Dant aurum regi saeculi,
Mortali myrrham homini,
Salutant parvum filium,
Deum ac regem omnium.

9. Admonet eos visio,
Ut redeant cum gaudio,
Per viam vero aliam
Reversi sunt ad patriam.

10. Gloria tibi, Domine,
Qui apparuisti hodie,
Cum patre et sancto spiritu
In sempiterna saecula.