115. In Assumptione BMV.

Ad Processionem.

1 Sancta Maria quid est? si coeli climata scandis,
Esto benigna tuis. Sancta Maria quid est?
Unde fremit populus vel cur vexilla coruscant?
Quid sibi vult strepitus? unde fremit populus?
5 Quare volant faculae, lucent per strata coronae,
Lumine cum lunae quare volant faculae?
Astra nitent radiis, rutilant et tecta laternis,
Cuncta rubent flammis, astra nitent radiis.
Edita consulibus numerasti, Roma, triumphos,
10 Signa moves planctus, edita consulibus?
Quae tibi causa mali, felix o gloria mundi?
Cur manant oculi, quae tibi causa mali?
Plaude, parens patriae, rorantia lumina terge,
Spem retines veniae, plaude parens patriae.
15 Martyrii pretio cecidit si prima propago,
Stas renovata modo martyrii pretio.
Limina primus adit silvis digressus arator,

Nunc tua piscator limina primus adit.
Pulvere multiplici crines foedaverat ille,
20 Hic te mundat aquis pulvere multiplici.
Paulus ovile tuum pascens educit aquatum,
Atque refert stabulis Paulus ovile tuum.

Respondet Roma:

Quid memoras titulos aut cur insignia prisca
Objicis in vultum? quid memoras titulos?
25 Enitui facie toto memorabilis orbe,
Callida sed vulpes enitui facie.

In mediis opibus meretrix nocturna cucullos

Induo prostituens in mediis opibus.
Nec metuens Dominum projeci carmine vultum,
30 Offendens nimium nec metuens Dominum.
Semino nunc lacrimas ad serae gaudia messis

Et post delicias semino nunc lacrimas.
Gaudia sustinui, lucrum si prima recepi,
Lucrificante Deo gaudia sustinui.
35 Nec procul est opifex gemmam carbone refingens
Et gremium pandens, nec procul est opifex.
En, ubi vultus adest quaerens oracula matris,

Prae natis hominum, en, ubi natus adest.
Vultus adest Domini, cui totus sternitur orbis,
40 Signo judicii vultus adest Domini.

Ergo fremunt populi nec cessant tundere pectus

Matres cum senibus, ergo fremunt populi.
Sistitur in solio Domini spectabile signum
Theotocosque suo sistitur in solio.
45 Hinc thymiama dabunt, hinc balsama prima reponunt,
Thus myrrhamque ferunt, hinc thymiama dabunt.
Dat schola Graeca melos et plebs Romana susurros

Et variis modulis dat schola Graeca melos.
Kyrie centuplicant et pugnis pectora pulsant,
50 Christe faveto, tonant, Kyrie centuplicant.

Invitatio ad orationem:

Sollicitemus ob hoc Dominum prece, carmine, lingua

Et matrem Domini sollicitemus ob hoc.
Virgo Maria, tuos clementius adspice natos,

Exaudi famulos, virgo Maria, tuos.
55 Supplicibus lacrimis tibi grex cum spargitur urbis,

Alma Maria, fave supplicibus lacrimis.
Turba gemit populi modico discrimine leti.

Sancta Maria, tibi turba gemit populi.
Sancta Dei genitrix, Romanam respice plebem
60 Ottonemque fove, sancta Dei genitrix.
Tertius Otto tuae nixus solamine palinae

Praesto sit veniae tertius Otto tuae.
Hic tibi, si quid habet, devoto pectore praestat,

Spargere non dubitat hic tibi, si quid habet.
65 Gaudeat omnis homo, quia regnat tertius Otto,

Illius imperio gaudeat omnis homo.