DUBIA.

Visibiles quidem, etc.

Hic manifestat quod dixerat in sacramentis, et ponit exemplum in cultu et sacramentis. De pertinentibus ad cultum quatuor ponit exempla, scilicet de imaginibus, de thurificatione, de luminaribus, de lectionibus quae leguntur in Ecclesia. In duobus autem sacramentis ponit exempla, scilicet in Ordine et Eucharistia.

Sed quaeritur, quare non ponit exemplum in aliis pertinentibus ad cultum, scilicet in genuflexione, et prostratione, et in aliis sacramentis ? Item quaeritur de numero eorum quae hic ponuntur.

Dicendum, quod prostratio repraesentat defectum nostrum, ex eo quod ex nihilo sumus : unde ex toto prosternimur, et surgendo ostendimus nos ab alio ad esse erectos : unde debetur Creatori secundum Damascenum. Genuflexio autem repraesentat defectum peccati : unde non ex toto prosternimur, quia per peccatum non cecidimus a naturalibus, sed a gratuitis : unde debetur Redemptori. Similiter omnia alia sacramenta praeter haec duo sunt principia bene ordinantia contra defectum ex peccato. Haec autem est intentio de repraesentantibus participationem beatitudinis : et ideo numerus eorum potest sic accipi. Aut enim manife-

stantur caelestia instructione, et sic manifestantur per lectiones : aut repraesentatione, et hoc dupliciter, quia vel repraesentatur nobis spiritualis suavitas, et hoc per thurificationem : vel ipsa dona spiritualia ex quibus est illa suavitas, et hoc dupliciter, vel prout participata, et sic in imaginibus, ut aurum significat splendorem sapientiae, et sic de aliis quae ponuntur in templo : vel secundum emanationem luminosam horum donorum, et sic per luminaria : et sic habes quatuor in cultu. Sacramenta autem aut repraesentant participationem beatitudinis, et sic Eucharistia : vel dispositionem participantium, et sic est Ordo.