QUAESTIO V.

Cur Fratres frequentius maneant in civitatibus et oppidis .

Item quaero: cum Religiosi a tumultu saecularium frequentius sese separare studuerint et in solitudinibus habitare, quid est, quod vos frequentius in civitatibus et oppidis manere soletis, quasi voluptuosius ibi pascendi, et inquietius et indevotius ibi vivatis ?

Respondeo. Tres sunt causae praecipuae, pro quibus inter homines morari solemus: una propter eorum aedificationem, ut promptius eis adsimus, quando requirunt a nobis paenitentiam, doctrinam et salutis consilium, et videant in nobis bonae conversationis exemplum. Si enim remoti essemus ab eis, nec ipsi possent ad nos, quando indigerent, commode accedere, et difficile esset, nos toties vocari, et maior esset nobis inquietudo continue currere et recurrere quam inter eos manere, et priusquam veniremus, affectio et compunctio requirentium poenitentiam saepe tepuisset.

Secunda causa est propter indigentiam victua-Itum, quia in locis desertis non inveniremus, quoties pro supervenientibus vel residentibus vel infirmis indigeremus, qui nobis necessaria vitae ministrarent, cum per nos non habeamus. Extranei etiam, qui pro consilio supervenirent, cam statim non possent expediri et recedere, cogerentur nobiscum frequentius hospitari, quod multis de causis nullatenus expediret propter inquietudinem, suspicionem et paupertatem.

Tertia est causa propter tuitionem, quia, si extra homines moraremur, nec libros nec calices nec vestes nec alia necessaria vitae servare possemus a latronibus vel praedonibus vel servientibus potentium.

Personae etiam saepius essent in periculo: si quando in praedicalione forsitan aliquos offenderemus, vel filium vel fratrem alicuius, de quo doleret, in Ordinem reciperemus, qui etiam amicum aut fratrem suum vellet malitiose vindicare , vel moleste ferret, nos in terra morari; domus nostras incenderet et nunquam possemus ibi pacifice morari. Qui autem habent possessiones et praedia sibimet sufficiunt, et ideo possunt extra civitates morari ; similiter et solitarii, qui paucis indigent, pauca ab aliis requirere necesse habent.

Sunt et aliae causae, quas modo praetereo, propter quas convenit inter homines potius quam in deserto iuxta conditiones nostri Ordinis habitare. Sed istae ad praesens sufficiant