24. In Nativitate Domini.

1. Nato canunt omnia
Domino pie agmina

2. Sillibatim neumata
perstringendo organica.

3. Haec dies sacrata,

in qua nova sunt gaudia
mundo plene dedita;

4. Hac nocte praecelsa
intonuit et gloria
in voce angelica.

5. Fulserunt et immania
nocte media
pastoribus lumina ;

6. Dum fovent sua pecora,
subito diva
percipiunt monita.

7. Natus alma

virgine, qui exstat
ante saecula,

8. Est immensa
in caelo gloria
pax et in terra.

9. Sic ergo caeli caterva
altissime iubila,
Ut tanto canore tremat
alta poli machina.
Sonet et per omnia
hac in die gloria
voce clara reddita.

10. Humana concrepent cuncta
Deum natum in terra;
Confracta sunt imperia
hostis crudelissima;
pax in terris reddita.
Nunc laetentur omnia
nati per exordia.

11. Solus qui condidit omnia,

12. Solus qui tuetur omnia,

13. Ipse sua

pietate solvat omnia
peccata nostra.