28. In Epiphania Domini.

1. ''Epiphaniam Domino
''canamus gloriosam,

2. ''Qua prolem Dei
''vere magi adorant ;

3. Immensam Chaldaei

cuius Persaeque venerantur
potentiam,

4. Quem cuncti prophetae
praecinere venturum gentes
ad salvandas.

5. Cuius maiestas
ita est inclinata,
ut assumeret servi formam.

6. Ante saecula

qui Deus et tempora,
homo factus est in Maria.

7. Balaam de quo vaticinans,
exibit ex Iacob rutilans,
inquit, stella

8. Et confringet ducum agmina
regionis Moab maxima
potentia.

9. Huic magi munera
deferunt praeclara:
aurum, simul tus et murram ;

10. Ture Deum praedicant,
auro regem magnum,
hominem mortalem murra.

11. In somnis

hos monet angelus,

ne redeant ad regem commotum

propter regna.

12. Pavebat

etenim nimium

regem natum, verens amittere

regni iura.

13. Magi stella

sibi micante praevia
pergunt alacres itinera,
patriam quae eos ducebat
ad propriam
linquentes Herodis mandata ;

14. Qui perculsus

corde nimia prae ira

extemplo mandat eludia

magica non linqui taliter

impunita,

sed mox privari eos vita.

15. Omnis nunc caterva
tinnulum laudibus
iungat organi pneuma

16. Mystice offerens

regi regum, Christo,
munera pretiosa,

17. Poscens, ut per orbem
regna omnia protegat
in saecla sempiterna.