Quaestio XXII.

Quaeritur, cur Fratres magis frequentent mensae divitum quam pauperum .

Item quaero: cum deberetis sicut pauperes Christi pauperibus esse familiares et eorum cibis esse contenti, quid est, quod magis frequentatis mensas divitum quam pauperum 1

Respondeo. Tria nos specialiter invitant ad hoc: videlicet nostra necessitas, quia, cum, itinerando per terram, lassitudine et fame fatigamur, apud illos promptius speramus obtinere refectionem, qui etiam pro honestate panem suum quibuslibet transeuntibus non negant, quam apud alios, quos nescimus.

Item, pauperum inopia, qui, si forte nos hilariter reciperent, expenderent nobiscum pro sua devotione in uno prandio, nobis etiam dolentibus, unde ipsi pluribus vicibus refici possent, cum non habeant, nisi quod quotidie propriis manibus elaborant .

Item, ipsorum divitum salus, qui per occasionem concipiant nostri familiarem notitiam, ut ad amorem Dei sic eos paulatim trahamus et salutis doctrinam eis ingeramus et per eleemosynae meritum Deum eis propitium faciamus. Pauperes per se ingerunt se et salutis consilia studiose requirunt, qui non habent in hoc mundo consolationem suam ; divites autem, terrenis contenti, vel mundanis negotiis occupati, vel superbia inflati, raro humiliant se ad quaerendum salutis consilium, nisi per occasionem aliquam ad hoc a bonis et Religiosis trahantur prudenter, sicut Dominus traxit Zachaeum et alios publicanos et peccatores, manducando cum eis et docendo, licet non ignoraret, Pharisaeos et scribas inde murmurare et materiam quaerere detrahendi .