BALTH. CORDERII, S. J, INTERPRETATIO,

Denique venerandam superessentialis Deitatis beatitudinem, elucidantium eloquiorum mysticae traditiones aliquando quidem ut Verbum et mentem, et substantiam laudant, convenientem Deo rationalitatem atque sapientiam ejus declarantes ; nec non essentialiter essentem existentiam, et rerum existentiae causam veram, atque instar lucis ipsam effingunt, et vitam appellant: cujusmodi figmenta sacra; cum quidem magis congrua sint, materialibusque figuris antecellere quodammodo videantur, attamen velut sic etiam a divinae similitudinis veritate deficiunt ; siquidem excedit omnem essentiam et vitam, neque ipsam ulla lux exprimit, omnisque ratio ac vita ab ejus similitudine incomparabiliter desciscit. Nonnumquam vero dissimilibus eiucidationibus ab iisdem eloquiis supermunclialiter celebratur, dum illam invisibilem, et infinitam et incomprehensibilem appellant, et ex quibus non quid est, sed quid non est significatur.