38. In Resurrectione Domini.

1. Clara gaudia, festa
paschalia

2. Congaudet coetus
per omnia

3. Dulce decantans
Alleluia,

4. In qua Christus per crucem
redemit animas inferno
deditas,

5. A protoplasto quotquot
in hoc saeculo progenitae
fuerant,

6. Patriarcharum
omniumque simul
prophetarum, regum, pontificum

7. Detinebantur
claustro tartareo
mortis cruore retrusae,

8. Donec victor mortis,
dominus omnium
atque sanctus sanctorum,

9. Cum crucis tropaeo
infernum penetrans
abegit claustra saeva.

10. ,Quis es", daemones
ululant, "lucifer, qui
nostra ut Deus
solvis vincula cuncta?"

11. Fugatis tenebris
fulserat theatralis
horror rutilans
lumine perlustrata.

12. Clamabant sancti:
"Advenisti,

o iam Domine ; regum
rex, ave!

13. "Quem olim vates
praecinere,

iam nos habes redemptos ;
rex, ave!"

14. Tunc Iesus cum laeta
sanctorum
gloria processit
morte victa,

15. Cui psallere laudes
sub omni

cardine non cesset
omnis aetas

16. Decantans Alleluia.