Quaestio VIII.

Cur Fratres prohibeant, ne alii deferant vestes suis similes.

Cum unicuique liberum sit vestem suam formare, prout vult, et de panno seu colore quolibet: videmini valde iniuriari quibusdam religiosis viris vel feminis prohibendo, ne deferant vestes in colore vel forma habitui vestro conformes.

Respondeo. Multis de causis habitum nostrum alios ferre non sustinemus et per privilegium apostolicum omnibus inhibemus: una causa, quia, cum simus ex professione Regulae mendicantes, si sub nostro habitu diversi hinc inde mendicarent, homines, qui iam illis eleemosynam dedissent, et nos vel alii in simili habitu iterum supervenirent, putarent, quod idem ex avaritia iterum peteret, et scandalizarentur de ipsis, vel de nobis, quod nimis eos petendo gravaremus.

Item, cum putarent nobis dedisse, quod aliis nobis similibus dederunt: qui inter habitus nescirent discernere, recusarent nobis iterum dare eleemosynam, et sic nihil acquirere possemus et periremus.

Item, cum multi intelligerent, quod homines magis diligerent nos et libentius nobis subvenirent quam aliis, sub habitu nostro per terras discurrerent et quod nobis dandum esset ipsi praeriperent fraudulenter et peccarent, et nos fraudaremur, et homines gravarentur.

Alia causa, quia, cum pro aedificalione Ecclesiae specialiter missi simus , si sub nostro habitu alius aliquo peccato scandalizaret homines, vel nos taliter infamaret, vel suam sic nequitiam contegeret, cum, reiecto habitu nostro, non agnosceretur, sed Frater Ordinis nostri putaretur hoc fecisse ; Ecclesia non haberet de nobis aediflcationera, sed scandalum, et nos frequentes exinde confusiones pateremur, cum multa similia attentarent, sicut comperimus, aliquoties esse factum. - Item, posset haereticus aliquis sub nostro habitu in locis opportunis docere haeresim, ut sic ei quasi probato Fratri Ordinis nostri crederetur, et nos similiter infamaret.

Item, si forte aliquando ex nostris aliqui in via minus honeste se gererent; cum super hoc corriperentur a nobis, possent excusare se, quod sub nostro habitu alii hoc fecissent, cum de personis esset dubium, quae fuissent. - Ne igitur tantus Ordo taliter confundatur, et tot mala inde proveniant: expedit, ut Ordinis nostri habitum nullus alius permittatur deferre. Quid etiam mali sequeretur, si mulieres eum ferre permitterentur, quisque prudens per se potest perpendere: et ideo est studiosissime prohibendum.