Quaestio XVII.

Cur tamen Fratres curam habeant Ordinis sanctae Clarae.

Quare ergo Ordinem sanctae Clarae in cura habetis, per quam libertas vestra similiter impeditur?

Respondeo. Ordo ille non est annexus Ordini serviliter, ut eis intendere teneamur: sed ex petitione domini cardinalis, qui utrique praeest Ordini , Ministri constituunt eis confessores, qui ecclesiastica interdum Sacramenta ministrent, et visitatores, qui eas corrigant. Alii Fratres non tenentur occupari pro ipsis nisi sicut pro aliis amicis Ordinis, quando volunt. Et quia clausae manent sub uniformi conversatione, hae facilius regi possunt. Quandocumque autem Ordo noster communiter videret non expedire sibi curam illarum gerere, potest se ab eis eximere, cum ex Regula nostra non simus alicui ex debito nisi Ordini obligati et singulari Ubertate inter ceteros Ordines ex privilegio gaudeamus. Licet autem omnino non possimus impedire, quin aliqua fiant in terris istis praedicti Ordinis monasteria: tamen, si non studiose obsisteremus, cito multiplicarentur per concessionem domini Papae vel cardinalis; et per hoc ostenditur, quod non diligimus multum occupari cum ipsis.