63. In Apparitione cujusdam miraculi Corporis Christi.
Ad Vesperas.

1. Jesu, creator orbis et redemptor,
Corporis sacri munera qui praestas,
Tribue nostris animis salutem
Sanguine tuo.
2. Tu nobis vitam praeparas felicem,
Panem et vinum dono tu concedis,
Regis quo nostros et gubernas actus
Pius et mitis.
3. Semper tu nostras illustrare terras
Mentesque summis confirmare signis
Curas et omnes salvos esse tuos,
Quos redemisti.

4. Non fuit nostris saeculis perlata
Fama tam grandis operis praeclari,
Ut Deus ipse tribuit benignus
Famulis suis.
5. Ut luce sexta creditur venisse
Coelo rex ille, miseratus nostra
Crimina ferre, uterum complere
Virginis almae.
6. Sic nobis demum incarnatus venit
Iterum dare populum salute,
Ferant ut omnes tanto sacramento
Laudes immensas.
7. Ergo tu, Christe, gaudia qui praestas
Vitae praesentis et futurae promis,
Nobis adesto, supplices precamur,
Gratia tua.

8. Ut grates uno pariterque trino,
Totum qui regit et gubernat orbem,
Solvere queat munere pro tanto
Chorus hic noster.