66. De sancto Mitrio.

In 1. Vesperis.

Antiphonae.

1. Mitrius nunc exaltatus

In coelis regnat beatus

Fruens jucunda mente,

Nam Christi athleta fortis

Sitiens calicem mortis

Currit illuc non lente.

2. Jugum Dei et onera

In prole fulgent libera

Illustrium Graccorum,

Spernens solum cum genere

Vadit post Christum propere

Ad sinum beatorum.

3. Prudens virtutes coluit,

Unde coli promeruit

Id vita sempiterna,

Habens in Deo cor ratum

Gaudebat se confirmatum

In gloria superna.

4. Assumptus jam super caelos

Laudabiles canit melos

In coelorum civibus,

Nam exutus ab onere

Sursum fertur in aetbere

Ornatus virtutibus.

5. Oremus omnes Mitrium

Nec cessent ora hominum

Precare conditorem,

Nam, dum Mitrio militi

Sumus laudibus dediti,

Deo damus honorem.

Ad Magnificat.

A. O felix urbs Aquensium,

Praeclara, adjacentium

Tu digna laude gentium,

Mereris nominari,

Nam coeli grata colonis,

Martyrum aucta coronis

Variisque freta donis

Diceris illustrari ;

In te fulget Mitrius inclitus,

In te jacet placide conditus,

Tuus ergo exsultet spiritus

In Deo salutari.

Ad Matutinum.

Invitatorium.

Aeternum trinumquo Deum

laudemus et unum,

Qui sanctum Mitrium

transvexit in aethera sursum.

In 1. Nocturno.

Antiphonae.

1. Hic vir beatus gloriae

Cum sanctis fructum petit,

Qui in via nequitiae

Peccatorum non stetit.

2. Apprehendens disciplinam

Servivit in timore

Regenti machinam trinam,

Exsultans cum tremore.

3. Ad nihilum est redactus

Malignus et deceptor,

Dum Christus sancto est factus

Gloria et susceptor.

Responsoria.

1. Mitrius clara veterum

Stirpe ortus Graccorum,

Sublimitate procerum

Fulsit ac senatorum,

Quos claritate operum

Illustravit ac moram.

V. Hic zelo tractus superum

Mundum reliquit miseram

Fortunamque suorum.

2. Ad longinqua vir nobilis

Peregrinus migravit

Provinciamque fertilis

Incola adoptavit,

Ubi sator perutilis

Virtutes seminavit.

V. Aquis degens vir humilis,

Miraculis mirabilis,

Coelitus corruscavit.

3. Jugo crudeli subjectus

Monstrat patientiam

Opprobriisque despectus

Nec causat injuriam,

Nam vicit coelo protectus

Tyranni saevitiam.

V. Verbis ac minis effectus,

In Deum semper erectus

Practendit laetitiam.

In 2. Nocturno.

Antiphonae.

1. Invocans Deum ferventer

In tribulatione,

Exauditus est clementer

In sua passione.

2. Scuto bonae voluntatis

Hunc Dominus protexit

Et per viam aequitatis

Introire direxit.

3. Ab angelis paulominus

Mitrium minuisti,

Super opera eminus

Ipsum constituisti.

Responsoria.

1. Custos vineae Mitrius

Durum patitur aemulum

Et insidiatorem,

Illati furti nescius

Levat ad Deum oculum

Innocentis tutorem ;

V. Auditur ergo citius,

Dum palmes per miraculum

Uvas fert supra morem.

2. Clarus plebis exhortator

Salutem adnuntiavit

Veritatisque lucem,

Fervidus Christi amator,

Quem caritas animavit,

Ut ferret ejus crucem,

V. Rectus quoque imitator

Semetipsum abnegavit

Secutus Jesum ducem.

3. Bonum certamen certavit,

Passus non victus superans

Tormentum malitiae,

Cursum vitae consummavit,

Cursu agili properans

Ad bravium gloriae;

V. Fidem Christi hic servavit,

Repositam desiderans

Coronam justitiae.

In 3. Nocturno.

Antiphonae.

1. Justus cultor justitiae

Vitae luxit exemplo,

Cujus sanctitas hodie

Recolitur in templo.

2. Ingressus tabernaculum

Domini requiescit,

Ubi aeternum speculum

Sanctis semper clarescit.

3. Tua, Domine, virtute

Mitrius lactabitur

Et gloria cum virtute

Victor coronabitur.

Responsoria.

1. Servus prudens,

fidelis probatus,

Supra multa

nunc constituitur,

Vir illustris

clementer vocatus

Coelestia

dives ingreditur ;

V. Sic meretur

Mitrius beatus,

In talento

juste operatus,

Dum ad summa

digne provehitur.

2. Assumptus

cum exsultatione

Laetatur

in sanctorum agmine

Qui in mundi

tribulatione

Lavit stolam

in Christi sanguine ;

V. Hic ereptus

de temptatione

Gloriosa

gaudet visione

Deitatis

amictus lumine.

3. Gemma coeli,

decus Aquensium,

Mitri sancte,

pro tuis precare,

Cura morbos,

abole vitium,

Tolle pestes,

festina juvare;

V. Hostem procul

repelle noxium,

Nobis Deum,

redde propitium,

Fac, ad eum

cuncta adspirare.

In Laudibus.

Antiphonae.

1. Sanctus Mitrius proelia

Adversus mundi gravia

Se virtute firmavit,

In coelesti militia

Post devicta supplicia

Ut Dominus regnavit.

2. In laetitia servire

Et cum sanctis introire

Corda vestra parate,

Choro juncti psallentium

In hymnis confitentium

Mitrio jubilate.

3. In terra manens deserta

Vana fugit et incerta,

Quae mundus offert reus,

In te sitivit anima

Devotione intima

Vigilans ad te, Deus.

4. Cuncta opera Domini,

Ejus immenso nomini

Laudes simul dicite,

Beato quoque martyri,

Sacerdotes et ceteri,

Semper benedicite.

5. Reges terrae et populi

Atque rectores saeculi,

Alumnum patrem luminum

Una cum sancto Mitrio

Adunato collegio

Nunc laudate Dominum.

Ad Benedictus.

A. O Mitri, martyr strenue,

Imitatus assidue

Christum, quem dilexisti,

Aspernatus progeniem

Propter coelestem requiem

Ad ignota fugisti,

Molestias et languores,

Contumelias, terrores,

Mortem tandem subisti.

Eja ergo, miles Christi,

Implora virtutes lapsis,

Duc eos per viam pacis,

Quo felix pervenisti.

In 2. Vesperis.

Ad Magnificat

A. Exsultet jam coelestis

Concio sanctorum,

Fidelium terrestris

Turba populorum

Promat laetitiam,

En Mitrius hodie

Certans in stadio

Cum palma victoriae

Virtutis brachio

Fecit potentiam;

O Martyr potens, fortis,

Scandens super alta,

Tuos post casum mortis

Supplices exalta

Ad coeli gloriam.