71. Versus de ploratu poeiiitentiac,

1. Totius mundi machinae creator,
Qui poli summa resides in arce,
Aure clementi modo me misellum,
Deprecor, audi.

2. Non queo verbis tibi confiteri
Cuncta, quae coram mala te peregi,
Ablui postquam merui sacrati
Fontis in unda.

3. Fraude deceptus lubrici draconis
Non dedi factis requiem nefandis,
Dum mihi virtus fuit et facultas
Id peragendi.

4. Fraus, furor, luxus, crapula, libido,
Livor et zelus, dolus et cupido
Me suo sicut studuere servo
Semper abuti.

5. Tu procul hostem remove malignum,
Tu dolos ejus laqueosque rumpe,
In quibus strictum studuit frequenter
Me religare.

6. Unde, cunctorum dominator alme,
Me potes, si vis, scio, liberare
Et tua rursum pietate sacra
Purificare.

7. Ut dies casum mihi cum suprema
Texerit mortis, precor, invenire
Nil in me possit ditionis suae
Pestifer anguis.

8. Angelus sed tunc mihi sanctus adsit,
Omnibus qui me vitiis piatum
Te, Deus, statim requiem jubente
Ducat ad almam.