EXPOSITIO TEXTUS.

B, Aliquando autem, etc.

Hic ostendit quomodo figuratur Deus ex infimis, scilicet terrestribus corporibus, dicens : Autem, id est, sed aliquando Theologi laudant Deum ex novissimis, id est, vilibus corporibus, laudantes eum ut unguentum suave. Cant. I, 1 et 2 : Meliora sunt ubera tua vino, fragrantia unguentis optimis. Et laudant eum. ut

lapidem angularem. Isaiae, xxviii, 16 : Ecce ego mittam in fundamentis Sion lapidem : lapidem angularem, etc, et, id est, etiam circumponentes ei, scilicet Deo bestialem formam. Osee, XIII, 8 : Bestia agri scindet eos. Et coaptant ei, scilicet Deo specialitatem, id est, speciem leonis et pantherae, Osee, v, 14 : Ego quasi leaena Ephraim, et quasi catulus leonis domui Juda. Et secundum septuaginta translationem qua utuntur Graeci, habetur, sicut dicit Hieronymus in Glossa : " Ego quasi panthera Ephraim. " Et iterum, vestiunt eum, scilicet Deum pardalineam et ursam saevientem, id est, has imagines ei circumponunt. Osee, XIII, 7 et 8 : Ego ero eis sicut pardus in via Assyriorum, Occurram eis quasi ursa raptis catulis. Addam vero quod visum est esse vilius omnium id est, omnibus, et magis singulare, quia sapientes divina tradiderunt ipsam, scilicet deitatem circum formantem seipsam specie vermis. In Psal. XII, 7 : Ego sum vermis, et non homo. Et ideo dicitur singulare : quia inducitur in persona Dei hoc de se dicentis : vel quia singulariter sacra Scriptura tam vilibus eum describit.

15