78. De sancto Ladislao.

In 1. Vesperis.
Super Psalmos.

A. Fons aeternae pietatis,
Lux supernae veritatis,
Tibi, Christe, complacente
Ladislao nos tuente
Fac consortes aeternorum
Te laudantes gaudiorum.

Ad Magnificat.

A. Confessor Domini, Ladislae,
Astantem plebem corrobora
Sancta tua intercessione,
Ut, qui peccatorum
pondere premimur,

Beatitudinis tuae
gratia sublevemur

Et te duce aeterna
gaudia consequamur.

Ad Matutinum.

Invitatorium.

Confessorum

regem adoremus,
Qui caelestis regni

meritum et gloriam
Concessit sancto

suo Ladislao.

In 1. Nocturno.

Antiphonae.

1. Hic iniquis non consensit,
Quorum viam dum contempsit,
Christi iugo se subiecit
Et, quae Deo placent, fecit
Operando, cogitando
Et doctrinam vitae dando.

2. Rex a Christo constitutus
Est ab ipso consecutus,
Quod virtute fit indutus
Et in monte sancto tutus.

3. Tua Christus est gloria,
Salus et victoria,
Ipse tuus est susceptor,
Idem noster sit protector.

Responsoria.

1. Edoctus spiritus sancti gratia
Beatus rex Ladislaus
Ruentis mundi gloriam
Sprevit ut transitoriam,
Secutus est iustitiam,
Qui pro Christi gratia
Perenni gaudet gloria.
V. Mundum sibi blandimentem,
Suos quoque seducentem
Contemnendo superavit
Et se Christo mancipavit.
2. Diuturnis excubiis
Instanter in ecclesiis

Deum obsecrabat,
Ieiuniis, vigiliis

Carnem macerabat,

Mentem roborabat
V. Ut Isaac exiens in agrum

meditabatur,
Dum divinae celsitudinis

speciem contemplabatur.
3. In iudicandis
Et examinandis
Causis non potentia
Sed prudentia
Decernebat,
Rigori iustitiae

Misericordiae
Lenitatem praeferebat.
V. Discretus in eloquio,
Utilis in silentio,
Cautus in consilio.

In 2. Nocturno.

Antiphonae.

1. Invocantem exaudivit,
In dilectum quem adcivit
Sibi Christus, cui donavit
Summum bonum, quod optavit.

2. Scuto bonae voluntatis,
Dono tuae pietatis
Ipsum, Christe, coronasti,
Quem ad caelum sublevasti.

3. Admirabile
Et ineffabile

Est nomen tuum, Domine,
Nam in tuo nomine
Sanctus iste prospere
Sublimis in aethere
Tecum gaudet vivere.

Responsoria.

1. In naturalibus bonis

Gratuitisque donis

Ipsum natura

Praerogativa

Praetulerat,

Quem dederat

Sibi valorem,

Cunctis meliorem;
V. Ladislai species

Digna fuit imperio,

Veneranda facies

Angelorum consortio.
2. Hunc circumdat veritas

Et misericordia,

Osculatur caritas

Simul cum iustitia,

Per hunc ad terrestria

Prospexit benignitas

Et dona caelestia

Nobis dedit deitas;

V. Caecis visum restauravit,
Mutis linguas reseravit,
Rupta membra roboravit,
Dissoluta solidavit.

3. Salve, rex benigne,
Ladislae, laude digne,
Honor noster et patrone,
Pie, potens, tutor bone,

V. Afflictorum portans onus
Et ad omne pium pronus.

In 3. Nocturno.
Antiphonae.

1. Domine, qui operatus
Est iustitiam
Et confirmatus
Est in gratiam,
Nunc in supremo solio
In sanctorum tripudio
Felici gaudet gaudio.

2. Ladislaus honoratur,
Cuius caput coronatur
Regum ritu generoso
De lapide pretioso,
Datur illi dignitas,
Aeterna felicitas.

3. Hic accepit
Benedictionem,
Quem suscepit
In adoptionem
Deus et devotionem
Eius clare commendavit,
Quem heredem adoptavit
Et in caelis coronavit.

Responsoria.

1. De radice regiae

Stirpis propagatus,
Illustris prosapiae

Stemmate prolatus,
De sancta progenie

Regum generatus,
Qui virtutum acie

Viguit stipatus;
V. Moribus nobilior,
Virtutibus clarior

Quam genere,

Cui vivere

Christus est in aethere.

2. iesu bone,

per Ladislai merita,
Nostra nobis

dimitte debita,
Domum, portam,

sepulcrum visita
Et a trina

nos morte suscita;
V. Actu, mente

vel usu perdita
Pietate

restaura solita.
3. Surge, gaude, Pannonia,
Felix intende prospere,
Ut collaudes felicia
Ladislai praeconia,
Noctis expelle taedia
Iam lucis orto sidere;
V. Surge, collauda Dominum,
Quia de viris sanguinum
Per hunc salvare voluit
Et liberare statuit
Te lucis ante terminum.

In Laudibus.
Antiphonae.

1. Sanctus iste indutus

Est decorem,

Qui secutus

Salvatorem

Consecutus

Est honorem

Mundi pompis meliorem,

Nam est eius fortitudo

Sempiterna sanctitudo.
2. Iubilate

Et invocate

Ladislai praesidium,

Quo per ipsum rex omnium,

Christus, nostrum sit gaudium.
3. Qui passus est propter nos,

Illuminet super nos

Vultum suum cum gratia
In beata gloria.

4. Mundialis fabricae
Gaudet universitas,
Te, beata trinitas,
Benedicit et condicit
Tibi laudes debitas.

5. Laudet te, rex gloriae,
Sancta vox ecclesiae
Sollemnizans hodie
Dulci voce melodiae.

Ad Benedictas.

A. Benedictus est salvator,
Sanitatis reparator,
Iesus Christus, qui beatum
Ladislaum sanitatum
Decoravit gratia,
Qui mira potentia
Multis aegrotantibus,
Pluribusque debilibus

De salute desperatis,

Mole mortis molestatis

Divinam medicinam

Adhibuit

Et sanitatem tribuit.

In 2. Vesperis.
Ad Magnificat.

A. O sancte rex Ladislae,
O columna militiae
Christianae,
O firmissima

spes tuae gentis,
Intuere devotionem

populi te quaerentis
Et sub tuum praesidium

confugientis,
O misericors,

misericordiam consecute,
Intercede pro nostra

omniumque salute.