De religionis ingressu. Rubrica I.

Statuimus in principio, quod nullus ad Ordinem recipiatur, nisi expropriatus omnino , cum, secundum Evangelii veritatem et nostrae Regulae professionem, paupertas sit totius spiritualis aedificii primarium fundamentum.

Ordinamus etiam, ut nullus recipiatur citra decimum octavum annum, nisi per robur corporis, vel industriam sensus, seu per excellentem aedificationem a decimo quinto anno et supra aetas secundum prudentium iudicium suppleatur.

Et quia non solum propter nostram salutem vocavit nos Deus, verum etiam propter aliorum aedificationem per exempla, consilia et salubria hortamenta: ordinamus, quod nullus recipiatur in Ordine nostro, nisi sit talis clericus, qui sit competenter instructus in grammatica, vel logica ; aut nisi sit talis laicus, de cuius ingressu esset valde celebris et famosa aedificatio in populo et in clero.

Si quem vero praeter hanc formam recipi oporteat propter familiaria officia exercenda, non recipiatur absque urgente necessitate, et hoc de Ministri generalis licentia speciali.

A venientibus ad Ordinem nec ante receptionem nec post petatur res aliqua temporalis. Et si quid petitum fuerit acceptum, auferatur totaliter nec utatur. Et quicumque subditus vel praelatus, praeter id quod in Regula conceditur, de rebus venientium ad Ordinem se intromiserit quoquo modo, tribus diebus in pane tantum et aqua ieiunet.

Recipiendus ad Ordinem, postquam examinatus fuerit secundum Regulam de fide et ecclesiasticis Sacramentis, interrogetur nihilominus de subscriptis, videlicet si corpore sit sanus, si conditione liber, si matrimonio non obstrictus , si debitis expeditus, si excommunicationis gravis vinculo non ligatus, si Religionem aliam non egressus, si voluntate promptus ad Religionis onera perferenda: tandem sibi Regula et asperitas Ordinis exponantur.

Ut autem novitii melius valeant informari, volumus, quod in qualibet Custodia a Ministro assignetur domus aliqua magis apta, vel duae, si una non sufficit, in qua, vel in quibus omnes novitii de Custodia collocentur usque ad tempus professionis suae. Ad quos informandos assignetur Frater religiosus et circumspectus, qui eos doceat pure et frequenter confiteri, ardenter orare, honeste conversari, humiliter obedire, servare cordis et corporis puritatem, zelare sacratissimam paupertatem et ad omnis perfectionis apicem anhelare. Et ut vacent melius ad praedicta et ad divinum officium addiscendum, toto probationis tempore studio non intendant nec promoveantur ad ordines sacros nec confessiones audiant, si fuerint sacerdotes, nec libros studii habeant specialiter assignatos. Si quos vero de saeculo attulerint, reponant eos sub custodia Guardiani. In scripturis vero aedificationis liceat eis secundam dispositionem magistri sui pro tempore occupari. Tempore vero novitiatus non loquantur cum aliquo saeculari vel Religioso alterius Religionis sine licentia et socio assignato nec litteras vel aliud recipiant vel mittant sine licentia speciali.

Completo probationis tempore, si ad professionem digni fuerint iudicati, professionem faciant in hunc modum: " Ego frater N. voveo et promitto Deo et beatae Mariae Virgini et beato Francisco et omnibus Sanctis et tibi, Pater, toto tempore vitae meae servare Regulam Fratrum Minorum per dominum Honorium Papam confirmatam, vivendo in obedientia, sine proprio et in castitate ".

Et qui eum recipit, promittat ei, si haec obserraverit, vitam aeternam.