De qualitate habitus. Rubrica II.

Cum Regula dicat, quod " Fratres omnes vestimentis vilibus induantur "; statuimus, ut vestimentorum vilitas attendatur in pretio pariter et colore. Omnino nigrae, vel penitus albae lunicae desuper non portentur nec de panno cardato, ubi alius haberi poterit bono modo. Fiant autem tunicae aptae, sine deformitate, non habentes superfluitatem in longitudine, vel latitudine.

Item, cum Regula dicat, quod " de Fratribus induendis Ministri tantum et Custodes sollicitam curam gerant ", sub Custodum nomine dans etiam intelligi Guardianos; ordinamus, quod pannus aptus secundum Regulam communiter ematur pro Fratribus pro dispositione Guardiani. Et de illo communi panno Ministri, Custodes, Guardiani, lectores, confessores, praedicalores , procuratores et ceteri Fratres sine distinctione aliqua aut specialitate tam inferius quam superius induantur, nisi pro manifesta et evidenti necessitate cum aliquo per praelatos fuerit dispensandum. Si vero pannus aptus secundum formam praehabitam alicui offeratur, Guardiano tradatur, qui de illo provideat ei, vel cui magis viderit expedire. Si quis vero contra fecerit, una die tantum in pane et aqua ieiunet, et Custos eidem tunicam auferat et non restituat, et ad hoc firmiter teneatur.

Item, cum dicat Regula, quod " Fratres habeant unam tunicam cum caputio, et aliam sine caputio qui voluerint habere, et quod eas repetiare possint ", nullus Frater inferiorem tunicam habeat nisi unam, vel simplicem repetiatam ; si quis autem pluribus indiguerit, non habeat nisi de licentia eorum qui secundum Regulam de Fratribus induendis " sollicitam curam debent gerere secundum loca et tempora et frigidas regiones ".

Item, contra superabundantiam vestium ordinamus, quod nullus Frater habeat duos habitus, et quod Guardiani non dent alicui Fratri habitum vel tunicam novam, nisi prius resignet, si quam habet superfluam. Et tunicae, quibus communiter Fratres non utuntur ad necessitatem, pro tempore in communi reserventur.

Item, cum ab institutione nostri Ordinis de forma habitus sit sine calceamentis incedere, et Regula calceamenta non concedat, " nisi his qui necessitate coguntur "; ordinamus, ut nullus Frater vadat calceatus, nisi cuius evidens necessitas Fratribus innotescit, vel per Guardianum suum est coram Fratribus sufficiens iudicata. Et quotiescumque quis contra ex deliberatione fecerit, toties dicat septem Psalmos poenitentiales et tot recipiat disciplinas. Si quis vero ex consuetudine inventus fuerit vitiosus, ultra septem Psalmos comedat in terra coram Fratribus in conventu.

Item, qui calceamentis indigent non portent stivallos, sed calceos corrigiatos et ante fixos. Et habeantur calceamenta pro celebrandis Missis in communi, et Fratres occasione Missarum illis tunc et non alias calceentur.

Cingulum habeatur chorda communis, et nihil portetur appensum ad chordam. Item, non dormiant Fratres sine habitu, cingulo et femoralibus, nisi manifesta necessitate vel infirmitate cogantur. Sani Fratres in locis, in quibus morantur, cuicitris et pulvinaribus de pluma non utantur. Excessus in tunicis, lectis et mantellis et calceamentis castigatione, qua convenit, reprimantur. Itaque in omnibus, quae ad habitum Fratrum spectant, ad imitationem patrum nostrorum reluceat semper austeritas, vilitas et paupertas.