108. De Compassione BMV.

Ad Laudes.

1. Juxta crucem deplorabat
Maria, virgo virginum,
In qua nudus exspirabat
Coelestis splendor luminum.

2. O Judaee scelerate,
Haec meo reddis filio,
Stulte nimis et ingrate,
Pro tanto beneficio?

3. Ille tuis reparavit

Claudis gressum, caecis visum,
Verbum mutis propinavit
Omnem curans et leprosum.

4. Ipse tibi suscitavit,

Quos plangebas jam defunctos,
Aures surdis adaptavit,
Cunctos sanans et aegrotos.

5. Ille pro te Pharaonem
Cum Aegypto flagellavit,
Tua manus ejus carnem
Flagellando laceravit.

6. In columna post ducatum
Ad terram fecit optimam,
Ad columnam tu ligatum
Ad poenam damnas pessimam.

7. Ipse tibi per desertum
Dulce manna ministravit,
Sed tuum fel et acetum
Os illius toxicavit.

8. Tu das illi pro regali
Sceptro cannam, pro corona
Dira nimis et crudeli
Caput ejns pungis spina.

9. Hic te semper exaltavit,
Quem prae cunctis despexisti,
Super omnes te ditavit,
Quem ut furem suspendisti.

10. Ergo saltem jam occissum
Deprecare meum natum,
Tam inique crucifixum,
Tuum parcat ut reatum.