103. De Compassione Beatae M. V.

1. Compassa filio
mater Maria
veneratur hodie,
quamvis semper sit digna laudibus.

2. Virgo sine macula
nec in radice
infecta crimine
actuali neque foedata,

3. Genuisti sine vae,
quod nuntians
paranymphus Gabriel:
Tecum Dominus, plena gratia.

4. Fungebaris
obsequio
placido,

cum peperisti, angelico ;
quem genuisti,
filius
tibi adplausit vultu hilari.

5. Simeonis
praesagio
hodie

orbata, mater, solacio,
cum dulcissimam
gladius
tuam pertransivit animam.

6. Quam, mater,
anxia stetisti
quando passionem
innocentis
filii

conspexisti incliti,
cruci affixi !

7. Cor matris
lancea filio
mortuo transfixit,
passionem
filius

dum gustavit corpore,
mater anima.

8. Nunquam sensit aliquis martyr,
ut mater Domini;
propter quod plus quam martyr
anxie sustinuit
mater id, quod suus
filius.

9. Quam tristis et afflicta fuit
illa benedicta !
Maerebat et dolebat
mater unigeniti.
Perpendat hoc quaevis
genetrix.

10. Audi nos,
tuum nobis

placa filium, O Maria;
nostri causa passus est,
ne quis pereat
frustratus morte sua.

11. Salva nos,
namque aegri,

confer medelam, Iesu bone;
tu novisti omnia,
tuo sanguine
cura mentis vulnera.

12. Eia, mater nobilis,
quam vehementem
dolorem gestaveras.
Tamen hune tua
fide temperas.

13. Filii mysterium
passionis tibi
nequaquam latuit ;
nam in te sola
fides patuit.

14. Laus patri gloriae,
qui suo filio

non pepercit, sed tradidit
pro omnium
nostrum criminibus.

15. Laus eius filio,
qui suo sanguine
nos patri conciliat ;
laus sit quoque
sancto spiritui.

16. Laus quoque matri, quae condolet
crucifixo.