114. In Assumptione BMV.

1. Virgo, Dei mater, Judaeae gloria gentis,

Virgo, Dei mater, populi miserere dolentis,

Virgo, Dei mater, prae cunctis sola beata,

Virgo, Dei mater, per te mors est superata.

2. Angelus adveniens, sancta Dei genitrix,
De coelis Gabriel, nobilis aula Dei,
Supplice voce tibi, sancta Dei genitrix,
Verba benigna tulit, nobilis aula Dei.

3. Sit Dominus tecum, sancta Dei genitrix,
Gratia te replet, nobilis aula Dei,
Virginitatis honor, coeli clarissima stella,
Virginitatis honor, salve, veneranda puella.

4. Virginitatis honor, coeli regina Maria,
Virginitatis honor, salva nos regis ab ira,
Tu Domini mater, virginitatis honor,
Sponsa Dei summi, stella Maria maris,

5. Janua coelorum, virginitatis honor,
Porta beatorum, stella Maria maris,
Gloria cunctorum, virginitatis honor,
Hunc defende chorum, stella Maria maris.

6. Hac fuit orta die coeli regina Maria,
Quae Christum genuit, hac fuit orta die;
Sit benedicta dies, in qua tu nata fuisti,
Dicite, pontifices, sit benedicta dies.

7. Sit benedicta dies, in qua sibi lac tribuisti,
Omnis homo dicat: sit benedicta dies.
Praefinita dies venit, regina Maria,
Qua coelos scandas, vade, beata nimis.

8. Occurrunt proceres coeli, regina Maria,
Omnia laeta vides, vade, beata nimis;
Angelicus coetus, coeli regina Maria,
Obvius, ecce, venit, vade, beata nimis.

9. Agmina coetorum, coeli regina Maria,
Undique laeta fluunt, vade, beata nimis.
Filius, ecce, tuus, coeli regina Maria,
Te laturus adest, vade, beata nimis.
10. Quae regina fuit carne deducta triumpho?
Nulla quidem, nulla; gloria magna tibi ;
Gloria magna tibi, summa jam sede locatae,
Et nunc et semper gloria magna tibi.