106. In Assumptione Beatae M. V.

1. Aureo

flore primae

matris Evae

florens rosa

processit, sicut sol

2. Oritur,

ut lucifer

inter astra

decoravit

polorum sidera.

3. Flavescunt campi eremi

colocasia, germinantque lilia

4. Odore novo, acantho

roscida nectarea rorantque arva.

5. Patris summa filius arce

convexo aevo,

clara suboles,

virtute paterna

ab exordio

patrat omnia ;

6. Nuntius celsa Gabriel,

summus angelus,

aeterni regis

egressus est castra,

anlae virginis

stetit radians.

7. Praecelsa virgo Maria pavescit

lumine; Gabriel

adfatur, inquit:

8. Concipies, alma regina, orbis

regem in saecula

regentem cuncta.

9. Intactaque Mariae virginis

tumuerunt viscera;

comitata fides credidit ;

digna namque tali foedere sola

10. Feta mater, gloriosa, casta,

ante partum integra

et post partum ; non est similis;

permansit genetrix inviolata.

11. Enixa regem

puerpera sacra

hominem una Deumque genuit

innuba servavit

florem pudica.

12. Porta, quae clausa

fuerat per Evam,

paradisi reserata praecelsae

meritis Mariae.

O quam benedicta

13. Inter omnes mulieres

fructu floris ventris tui !

Exemplo

sine placuisti sola

14. Nec primam similem visa

nec habebisque sequentem

felixque

nimium es, O Maria.

15. Velut sol migrans cuncta

conscendisti globorum

luminaria,

lucerna nitens

inter choros angelorum.

16. Hodie caeli templa

scande, beata Dei

genetrix alma

cum caelicolis

exorare regem regum.

17. Ruricolas cunctos tua

annua recolentes

recepta caelifera patria,

18. Precibusque tuis fulti

obtentu gloriemur

simul per aeterna saecula,

19. Florigera castra

una fruamur, alma.