127. De Omnibus Sanctis.

1. O salutaris virgo, stella maris,
Generans prolem, aequitatis solem.
Lucis actorem, retinens p udorem,
Suscipe laudem.

2. Coeli regina. per quam medicina
Datur aegrotis, gratia devotis,
Gaudium maestis, mundo lux coelestis
Spesque salutis.

3. Aula regalis, virgo specialis,
Posce medelam nobis et tutelam,
Suscipe vota precibusque cuncta
Pelle molesta.

4. Virtutum chori, summo qui rectori
Semper adstatis atque jubilatis.
Ovis remotae memores estote
Noaque juvate.

5. Felices estis, patriae coelestis
Cives. cunctorum nescii malorum,
Quae nos infestant miseramque praestant
Undique vitam.

6. Unde rogamus atque supplicamus,
Ut foveatis atque muniatis
Vestros conservos, quorum rex super vos
Cum patre regnat.

7. Patriarcharum atque prophetarum
Pollens senatus diluat reatus,
Sedens in thronis, renitens coronis,
Vestibus albis.

8. Ordo sanctorum nos apostolorum
Regat docendo, doceat regendo.
Votis intendant, supplices defendant,
Vincula solvant.

9. Pacis augmentum poscat innocentum
Grex candidatus, quos rex perturbatus
Jussit necari, metuens privari
Culmine regni.
10. Triumphatores mundique rectores
Fide vicerunt, gloriam spreverunt,
Nobis suorum donent triumphorum
Gaudia secum.
11. Impetret votum chorus sacerdotum
Nec non cunctorum coetus confessorum,
Omnes qui gratum Deo famulatum
Exhibuerunt.
12. Grex virginalis oret, ut de malis
Saecli praesentis simul et sequentis
Eripiamur et, quae postulamus,
Accipiamus.
13. Universorum cunei sanctorum

Coelo gaudentes nobis sint clementes,
Quibus adjuti mereamur uti
Luce perenni.
14. Omnes electi, compotes effecti
Vitae beatae, Dominum rogate,
Nobis ut laetam donet et quietam
Ducere vitam.
15. Praestet levamen nobis et juvamen,
Quo mundi fluctus gehennaeque luctus
Sic evadamus, ut, quae nunc speramus,
Obtineamus.
16. Lux sempiterna, pie nos guberna,
Pater ac nate parque deitate
Spiritus sancte, Deus unus ante
Saecula trinus.