DIVISIO ET EXPOSITIO TEXTUS.

A. Ideo autem, etc.

Hic secundo probat, quod per Angelos descendant illuminationes in nos per primordia novae legis hoc modo. Illuminationes de mysterio incarnationis quae sunt nobilissimae et nobilissimis factae, factae sunt ministerio Angelorum : ergo multo magis aliae.

Et circa haec duo facit. Primo ponit rationem. Secundo monstrat per sex exempla, ibi (sig. 8, B), Sic ergo divinissimus.

littera sic legatur : Diximus lationem veteris legis venisse ad nos ministerio Angelorum : autem, id est, sed video per Scripturas, quod Angeli primum docuere, id est, sunt edocti a Deo : sic etiam est in Graeco, ut dicit Commentator : vel imbuti, vel instructi : et, id est, etiam divinum mysterium, id est, occultum humanitatis Christi, deinde per ispos, scilicet Angelos, gratia hujus scientiae descendit in nos per ministerium eorum.